Tinan 2023, FBATL Prontu Simu Manny Pacquião

SAPNewsTL, Dili: Federasaun Boxe Amadora Timor-Leste (FBATL) prontu realiza Kampionatu Nasional iha tempu badak no simu Boxista Lejendáriu Manny Pacquião tanba Ministru Juventude Desportu Arte Kultural (MJDAK) Nelio Izaac Sarmento informa ona sei konvida iha fulan setembru 2023.

“Ami nia preparasaun masimu tiha ona atu realiza kampionatu nasional boxing nian maibe difikuldade oituan iha fatin kompetisaun tanba jinajiu desportu Dili la disponivel tanba plafon daudaun at hela seidauk hadia, tuir lolos ami realiza kampionatu komesa iha loron 24 to’o 29 fulan jullu 2023 maibe tanba difikuldade ba fatin kompetisaun”.

“Tan ne’e ami sei hato’o karta ba fali MJDAK hodi husu estadium munisipal Dili para prepara fatin tiha pois ami informa fali ba MJDAK katak ami prontu ona realiza kampionatu nasional boxing nian iha tinan ne’e”, dehan Sekretariu Jerál FBATL Rogerio Amaral ba jornalista sira salaun Ian Martin Balide, Dili sabadu (22/07/2023).

Rogeriu hatutan, kona ba kampionatu nasional tinan ne’e nia orsamentu ba sira hetan husi governu liu husi Komisaun Regulador Arte Marsial (KRAM) ho montante 19,000 USD.

Sekretariu jeral ne’e informa tan, sira sente orgullu tanba boxista lejendariu Manny Pacquião hakarak mai Timor-Leste no hari’i Pacquião boxing Camp

“Ami sente orgullu tebes tanba Manny Pacquião nu’udar boxista famozu iha mundu hakarak mai Timor-Leste no hari’i Pacquião Boxing Camp”, tenik Sekretariu Jerál

Nia afirma tan, kona ba boxista lejendariu Manny Pacquião atu mai Timor-Leste ne’e sira sei prepara eventu, karik nia mai duni iha setembru hanesan ministru juventude desportu arte kultura Nelio Izaac Sarmento informa ne’e.

Antes ne’e, Ministru Juventude Desportu Arte no Kultura Nelio Izaan Sarmento haktuir Fulan Setembru Manny Pacquião sei mai vizita Timor Leste no sei loke Pacquião Boxing Camp