Prevene Inundasaun, SEEAS Forma Ekipa Normaliza Mota Iha Kapitál Dili
SAPNewsTL, Dili: Sekretariu Estadu Eletrisidade Agua no Saneamento (SEEAS), Santos Noronha hatete SEEAS hala’o sorumutu ho ekipa, sorumutu ne’e koalia kona ba normalizasaun mota sira iha Dili laran tanba tempu udan fo impaktu negativa ba komunidade sira
Sekretáriu Estadu ne’e haktuir objetivo husi enkontru ida ne’e hodi serbisu hamutuk entre linha ministerial sira, hodi antisipa hela karik udan monu rai bele minimiza inundasaun ne’ebe baibain sempre akontese kada tinan
“Ekipa de serbisu ohin ko’alia ba malu hodi normaliza mota sira no drainazen sira, lixu sira no sedimentasaun sira oioin sei hasai no soe hotu ba fatin seluk”. Tenik SEEAS Santos Noronha ba Jornalista sira hafoin hala’o sorumutu ho linhas Ministériu sira iha Salaun EDTL, Dili, 03/10/2023
Santos Noronha hatutan, Mota iha Dili laran hamutuk iha 5 mak identifika, mota hirak ne’e mak sempre fo ameasa wainhira udan boot hanesan mota komoro, mota lahane ba kuluhun, mota bidau Santana, mota benemaun, no mota bekusi, mota detailu lima ne’e ho nia drainagen sira ne’e barak, entaun presiza halo normalizasaun hodi evita inundasaun sira ne’ebe ho volume mota boot
“Tuir observasaun ne’ebe ami hare kuaze nakonu ho sedimentasaun ho lixo sira tanba ne’e prezisa ita nia intervensaun lalais”. Nia subliña
Governante ne’e informa, kada diresaun tau nia orsamentu tuir kbiit rasik hodi halo normalizasaun tanba konsidera mota sira ne’ebé nakonu ho sedimentasaun ne’e risku ba komunidade sira ne’ebe hela besik
“Orsamentu agora dadauk tama iha ekipa ami ida-idak ho nia kbit rasik, ita Hatene katak iha Sekretariu Estadu balun orsamentu to’o agora seidauk iha maibe ho kbit maka ita iha, IGE mai ho nia kbit kontribui mina no ekipamentu Sira”. Nia informa
Partisipa iha sorumutu ne’e mak reprezentante husi Sekretaria Estadu Terras Propriedades, Protesaun Sivil , Sekretariu Estadu Toponimia no Autoriedade PNTL Munisipiu Dili
Enkuantu, Prosesu normalizasaun mota sira iha Kapitál Dili ne’e hahu ho ekipamentu pezadu sira Instititu Gestaun no Ekipamentu (IGE) nian
Jornalista : Ermelinda Soares