Estudante UNTL, Marino Sadik Mikrolete Kontinua Paradu & Loke Dalan Ba Tum-Tum
SAPNewsTL, Dili : Relasiona ho folin mina ne’ebe sa’e halo kondutor mikrolete sira liliu 010, 03, 08 no 011 iha kapital Dili barak la halai, situasaun ne’e halo estudante barak la tuir aula no tama tarde tanba mikrolete la halai
Estudante Universidade Nasionàl Timor Lorosa’e (UNTL) Marino de Deus Pinto dejafia kondutor mikrolete sira hodi la halai durante fulan ida
“Ohin Mikrolete la halai, halo kolega estudante barak lakon aula no tama tarde, Ha’u sadik (dejafia) kondutor mikrolete sira hodi labele halai durante fulan 1,”
“Nune’e sira mos bele sente aktu ne’e diak ka lae, wainhira iha problema bele hato’o ba guvernu liliu Diresaun Nasionàl Transporte Terrestre (DNTT), lalos deside paradu derepente hodi halo estudante sira sai vítima”. Tenik Estudante UNTL Marino de Deus Pinto ba SAP News iha Kampus Faspol Kaikoli, 04/10/2023
Marino akresenta, folin mina sa’e ne’e bele komunika ho guvernu liu husi DNTT maibé labele deside hodi paradu tanba estudante barak no sidadaun barak laiha transporte privadu hodi uza ba halo movimentasaun
Estudante UNTL ne’e mos husu Guvernu Konstitusional dasia hodi fo autorizasaun ka loke dalan ba transporte públiku hanesan Tum-Tum hodi bele halo mos sira nia sirkulasaun iha Dili laran nune’e bele fasilita komunidade sira ne’ebe presiza halo viajem
Entretantu, Kondutor Mikrolete sira deside hapara Provizóriu tanba kauza husi folin kombustivel Sa’e husi $ 1.18 ba $1.33 centavos
Kondutor sira konsidera folin mina sa’e prejudika sira nia rendimentu tanba loron ida kada mikrolete tenki hatama 25-30 dolar ba na’in mikrolete sira, nune’e sira hakarak estudante sira hotu tantu passajeiru baibain hotu-hotu selu hanesan ho valor $0.25 centavos kada viajem
Iha sorin seluk, Estudante Institute of business (IOB) Izabel Hornay sente trizte tanba mikrolete la halai, rezulta nia lakon aula
“Ha’u trizte tebes tanba mikrolete la halai, halo hau la konsege tuir aula tanba to’o tarde (Husi Bidau la’o to’o Pantai Kelapa), tan ne’e husu guvernu rezolve folin mina, karik bele fo fatin mos ba transporte públiku Tum-Tum hodi halai iha Kapitál Dili”. Nia Husu
Hafoin Notisia ne’e tun, SAP News seidauk halo komfirmasaun ho parte DNTT tanba sei okupadu ho servisu balun, maibé SAP News sei tenta hodi kontinua divulga informasaun sira ba públiku relasaun ho kazu mikrolete la halai
Enkuantu, Mikrolete 01, 02, 04, 06, 05, 07, 09, 012 no 013 balun kontinua halo movimentasaun hanesan baibain maske folin mina sa’e
Jornalista : Ermelinda Soares