SAPNewsTL, Dili: Delegasaun nain-25 inklui atleta nain-11 husi Komite Paralimpiku Nasional Timor-Leste hasoru malu ho Primeiru Ministru José Alexandre Kayrala Xanana Gusmão iha Palasiu Governu hodi kumprimenta katak atleta paralimpiku prontu ona atu kompete iha Asian Para Games 2023 iha Hangzhou, China.
“Ohin hasoru malu ho delegasaun komite nasional paralimpiku Timor-Leste, ha’u la husu buat barak ba kompete tuir saida mak bele no halo relasaun ho atleta paralimpiku sira iha rai liur para fila fali mai ho sira seluk dezenvolve atividade desportu sira laos paralimpiku nian deit”, dehan Primeiru Ministru José Alexandre Kayrala Xanana Gusmão ba jornalista sira iha salaun Palasaiu Governu Dili, kinta (05/10/2023).
Primeiru Ministru hatutan, nia husu ba delegasaun komite nasional paralimpiku Timor-Leste atu tau matan didiak ba atleta paralimpiku sira iha China para labele hetan problema iha ema nia rai.
Iha fatin hanesan, Ministru Juventude Desportu Arte Kultura Nelyo Isaac Sarmento informa, ohin atleta paralimpiku sira mai hasoru governu tanba atleta paralimpiku sira prontu ona atu kompleta Asian Para Games 2023, iha Hangzhou, China
“Ohin ita nia atleta paralimpiku mai hasoru primeiru ministru José Alexandre Kayrala Xanana Gusmão nu’udar serimonia despedida tanba ita nia atleta paralimpiku sira prontu ona atu ba partisipa Asian Para Games 2023 iha Hangzhou, China”.
Nune’e delegasaun Timor-Leste inklui atleta sira sei aranka husi Timor-Leste ba China iha loron 15 fulan outubru 2023 delegasaun Timor-Leste hamutuk nain-25 inklui atleta nain-11 husi modalidade para atletizmu, tenis meja no hit besi (powerlifting)”, Nelyo hateten,
Ministru salienta tan, atleta paralimpiku sempre hamorin Timor-Leste nian naran iha jogu internasional sira tanba sira partisipa iha tinan 2018 iha Palembang, Indonesia, atleta sira lori medalla osan mean mai Timor-Leste hein katak tinan ida ne’e sira bele hetan prestasaun lori medalla mai Timor-Leste
Atleta para tenis meza Pascoela dos Santos Pereira hatete, nia labele promete hetan prestasaun maibe nia kompete tuir saida mak nia bele.
“Ha’u labele promete hetan prestasaun maibe prontu ho forsa nakonu atu kompete iha Asian Para Games 2023 iha Hangzhou, China maibe sei esforsu nia an joga tuir saida mak hau bele lori ita nia nasaun nia naran”, tenik Pascoela
Entretantu, orsamentu husi governu liu husi Ministério Juventude Desporto Arte Cultura (MJDAC) apoiu ba atleta paralimpiku nain-11 halo preparasaun iha Timor-Leste ho montante 59,000 USD no apoiu ba delegasaun Timor-Leste nain-25 inklui atleta nain-11 orsamentu ho montante rihun atus ida resin.
Atleta paralimpiku husi modalidade para atletizmu mak Teofilo Freitas, Abel de Jesus, Domingos da Costa no Domingos Pereira Lobato, husi modalidade para tenis meza mak Pascoela dos Santos Pereira, Domingos Talo Mau, Bernardo de Carvalho, Paulo da Silva Neves ho Liliana da C. S. Mesquita no husi para powerlifting (hit besi) mak Silveiro Martins ho Antonio J. A. Serrão, delegasaun komite nasional paralimpiku Timor-Leste nain-25 kompostu husi xefi misaun, parte ezekutivu CPNTL ofisial, treinador ho atleta paralimpiku nain-11.
Reportajen: Augusto dos Santos
