Promove Igualdade Jéneru & Demokrasia ! Ana Kandidatu Ba Xefe Suku
SAPNewsTL, Dili : Kandidatu Xefe Suku HoraiQuic Ana Paula de Araújo da Silva hateten, tempu ona promove igualdade jéneru, demokrasia no liberdade ba feto sira hodi husik dapur no kompete iha eleisaun lideransa komunitariu tanba daudaun ne’e mosu injustisa sosial no klase oioin
Nune’e, Jerasaun Foun feto sira mai ho hanoin kritiku, produtivu, konstrutivu no inovativu hodi hamrik kandidata ba xefe suku, atu bele tama iha sistema laran hodi ukun no halo mudança hamutuk liliu halakon injustisa sosial sira
“Konstituisaun Repúblika Demokrátika Timor-Leste (RDTL) artigu 17 define katak feto no mane iha direitu hanesan, Lei fo dalan atu feto sira hola pozisaun, tempu ona hodi feto sira husik dapur, promove igualdade jéneru, demokrasia no halakon injustiça sosial iha area rural”. Tenik Kandidatu Xefe Suku HoraiQuic, Maubesse ba Jornalista SAPNewsTL iha Metinaru, 04/10/2023
Ana Paula aprofunda, Movimentu Resistênsia Sosial (MRS), Forsa Humanista Timor-Leste (FHTL), motiva nia hodi kandidata an ba Xefe Suku tanba durante ne’e nia konsege aprende barak iha organizasaun hirak ne’e inklui hola parte iha servisu voluntáriu sira
“Ha’u involve an iha MRS no FHTL, Ha’u aprende buat barak husi ne’eba, programa ne’ebe ha’u halo hetan mos ideia oioin husi Organizasaun FHTL no MRS, Ha’u prontu ona hodi servi komunidade HoraiQuic Maubesse”. Ana Paula hateten
Estudante ativu Universidade Oriental Timor Lorosa’e (UNITAL) ne’e promote sei fo prioridade ba setor agrikulura, edukasaun, turizmu no saúde tanba setor haat ne’e save ba moris diak komunidade nian
Wainhira eleitu ba Xefe Suku HoraiQuic, Kandidatu ne’e afirma sei kria biblioteka suku, média Officer suku, sentru formasaun suku inklui hakbesik ukun ba komunidade sira iha area remotas inklui halakon injustisa, klase sosial no kultura patriarkal iha Maubesse
Tuir Observasaun Jornalista SAPNewsTL iha Munisipiu hot-hotu nota katak Joven feto no mane barak mak hatudu ona sira nia prontidaun hodi kandidata no prontu ho programa sira hodi hadia dezenvolvimentu ne’ebe la’o iha area rural
Eleisaun Suku sei realiza iha loron 28 fulan Outubru tinan 2023, Kandidatu Xefe Suku sira sei submete nia lista kandidatura iha loron 13 fulan Outubru.
Jornalista : Domingos Ferreira Conseição