ADTL Kondena Aktu Mafiozu Bosok Leonito Ho Osan Falsu Sosa Nia Sigaru no Pulsa

Reportagem Jonh Marito, Dili : Assosiasaun Defisiénsia Timor-Leste (ADTL) halo komunikadu imprensa kondena aktu bosok Leonito da Costa ema ho defiensiénsia Matan ne’ebe lor-loron hala’o nia atividade negosiu tuir dalan hodi fa’an sigaru no pulsa iha Kapitál D|ili, iha ne’ebe ema pessoal mafiosu ida bosok nia ho osan falsu hodi sosa nia pulsa telephone no sigaru iha area Fatuhada, loron 02 fulan Maiu 2022

Tuir Porta Voz ADTL Rozalia Pereira hateten, ʺBainhira Leonito simu tiha osan tahan ne’e, Leonito hateten dala rua tuituir malu katak keta bosok ha’u, tanba ha’u labele haree osan ne’e, maibe Mafiozu ne’e jura hodi dehan ne’e osan dollar sanulu, ne’ebe ita boot fo ha’u pulsa telemor neen (6) no sigaru LA Masu rua, nia lolo ba mafiosu refereʺ. Dehan Porta Voz Assosiasaun Defisiénsia Timor-Leste (ADTL) Rozália Pereira, iha Salaun ADTL Maskarinhas, 04 Maiu 2022.

ʺLeonito hakat pasu hirak deit hetan tiha ona F-FDTL laran diak ida ne’ebe ho intensaun atu hola pulsa husi Leonito, iha oportunidade ne’e, Leo ho hakraik an husu F-FDTL ne’e dehan, maun, ajuda haree ha’u nia osan ne’e lai, wainhira nia haree osan ne’e, osan dollar atus ida ne’e, osan falsu nian. Leonito ho sentimentu trizte no fuan moras hodi hateten, ema ne’e bosok ona ha’u ho osan falsuʺ. tenik Porta voz Rozalia ba Sapnewstl ohin

ʺMaijor laran diak ne’e tenta hodi husu ema balun iha Area Fatuhada, maibe ema hotu la hatene, se mak halo asaun refere, nune’e Maijor refere lori nia ba hato’o keixa ba Polísia Eskuarda Ai-Mutinʺ.

ʺNune’e ho aktu imoral mafiozu ne’e, ami hirak ne’ebe ala’o knaar ba protesaun direitu ema ho defisiénsia hakarak husu ba :

1. Autoriedade Seguransa PNTL no PSIK atu buka tuir autor mafiozu ne’e ho ita boot sira nia profisionalizmu.
2. Husu ba Autoriedade Judisiáriu atu lailais halo investigasaun no kriminaliza asaun imoral ida ne’e
3. ADTL konsiente katak asaun hanesan ne’e planeadu husi individu no grupu ruma ne’ebe lori osan falsu hodi habosok ema kbiit laek sira ne’ebe buka sira moris husi sira nia kosar-ween rasik
4. Husu ba Públiku entidade hotu-hotu atu respeitu no valoriza direitu sidadaun ho difisiensia iha pais ida ne’e.
5. Husu ba Públiku atu labele mai ho hanoin kariedade no kuitadu deit ba ema ho defisiénsia maibe tenki hanoin fo oportunidade atu ema ho defisiensia bele hola parte iha atividade tuir kbiit ne’ebe ema ida-idak iha.
6. Husu ba parte kompetente atu asegura dalan públiku sir abele asesu ho livre husi ema la’o ain tanba dala barak trotoar sira okupa tiha husi negosiante sira, nune’e difikulta ba ema ho defisiente atu la’o mesak no livre iha dalan públiku
7. Alerta ba públiku katak hahalok ne’ebe mafiozu ne’e halo hasoru maluk defisiénsia ne’e, aktu imoral tanba ne’e mai ita hakribit hahalok aat ida ne’eʺ.

Porta Voz Rozália Pereira akresenta katak ‘Maske Leonito ho limitasaun ne’ebe boot, maibe, Leonito nunka tane liman hodi sustenta nia moris, tanba ne’e mai ita louva Leonito hanesan ema inspirador ida iha ita nia sosiedade no merese ema hotu banati tuir asaun ida ne’e’. nia hakotu

Enkuantu to’o notisia ne’e publika, media Sapnewstl seidauk hetan resposta ruma husi parte autoriedade seguransa Munisipiu Dili, tanba sei iha hela faze Processu investigasaun.

Jornalista : Jonh Marito

Editor : Sergio Delekuar