Ahi Han Mutuk Uma Lisan Lekur-Lorasa, Hateke Husi Dook Nakonu Ho Matan-Ween
Imajem Ahi-Han Uma Lisan Lekur-Lorasa, Luro, 25/02/2023
SAPNewsTL, Lautem: Família bo’ot uma lisan Lekur-Lorasa triste tanba curto circuito elétrico energia elétrico rezulta ahi han uma adat lekur-Lorasa iha Lebere, Aldeia Etanice, Suco Cotamuto, Postu Administrativu Luro, Munisipiu Lautem
“Ami família bo’ot Lekur-Lorasa sente triste tebes tanba situasaun ne’e akontese derepente no halo ami labele halo buat ida, ami hateke husi do’ok ho laran triste”. Dehan Agustino Lekur liu husi via whatsapp ba SAPNewsTL iha Luro, Sábadu, 25/02/2023.
Agustino hatutan ahi han uma adat ne’e tanba fiu eletrisidade kanek nune’e hamosu ahi han iha parte kakuluk nune’e labele salva sasan sira iha laran.
“Ahi han uma adat ne’e tanba fiu eletrisidade kanek ka curto circuito energia elétrica rezulta uma adat família bo’ot Lekur-Lorasa to’o mutuk, entaun la konsege salva sasan ruma iha ne’e liliu eransa ka patrimóniu beila sira nian”. Nia informa
Imajem Ahi Han-Mutuk Uma Lisan Lekur-Lorasa
Nia akresenta, uma na’in no komunidade tenta atu hamate ahi maibe la bele salva tanba do’ok husi be’e no ahi han husi parte kakuluk nune’e ahi han mutuk sasan sira ne’eb’e iha laran inklui motor ida.
“Sasan sira ne’ebé iha laran ne’e hanesan hare, bikan, kanuru, sana, tasu, tais, ropa no sasan lulik sira hanesan Cris, Fatuk lulik, titir, samurai, ahi matan no motor revo ida inklui sasan sira seluk ne’ebe iha uma ne’e. Nia hatete
Entretantu, situasaun ne’e lori lori tristeza ba familia bo’ot Lekur-Lorasa tanba obrigado tenke lakon património kultural ho sasan antiguidade sira ne’ebé beila sira rai hela ba sira.
Jornalista: Luis Pailofo