Aposta Iha Kualidade ! MESSK Admite Estudante 5.236 Ba UNTL & IPB

SAPNewsTL, Dili : Ministru Ensinu Superior, Siénsia no Kultura (MESSK) ofisialmente fo sai ona ba públiku rezultadu asesu husi rejime jeral no espesial ba Univerdidade Nasionál Timor Lorosa’e (UNTL) no Institutu Politékniku de Betanu (IPB) ba tinan Akademiku 2024 hamutuk 5.236.

Ministru Ensinu Superior, Siénsia no Kultura (MESSK) José Honório Jerónimo haktuir tinan ne’e foti valor kiik liu mak 46, ho hanoin ida katak tenki foti estudante ne’ebe iha kualidade hodi prepara sira kontribui ba dezenvolvimentu nasionál.

“Tinan ne’e ita foti valor mínimu liu maka haatnulu resin neen (46), nune’e bele aposta ba kualidade, ida ne’e importante teb-tebes, joven ne’ebe asesu ba UNTL no IPB tenki diak, ita tenki hatudu ba públiku katak servisu ne’e transparante, tuir regras, rigor no tuir diploma ministerial, tanba ne’e agradese ba tékniku sira hotu husi linha ministerial sira”.  Tenik Ministru Ensinu Superior, Siénsia no Kultura (MESSK) José Honorio da Costa Jerónimo iha Salaun MESSK Kolmera, 02/02/2024

Iha komunikadu imprensa ne’e, Ministériu Ensinu Superior Siénsia (MESSK) liu husi Presidente Komisaun Asesu Ensinu Superior (KAES) Maria Filomena Guterres Lay informa lista ne’ebe admitidu ba UNTL no IPB hamutuk 5.236

“Númeru total husi rejime jeral no espesial hamutuk 27.398 fahe ba sekundaria jeral hamutuk 23.256 no tékniku vokasionál hamutuk 4.142, finalista sira ne’ebe prense buletim hamutuk 12.098 husi sekundáriu jeral  10.633 no tékniku vokasionál hamutuk 2.235, entre sira kandidatu ne’ebe admitidu ba UNTL hamutuk nain 4.774 no ba IPB hamutuk na’in 462 ho total hamutuk nain 5.236 maka sei asesu ba Ensinu Superior Publiku iha tinan akademiku 2024.” Informa Presidente KAES, atual Diretora Jeral MESSK Maria Filomena Lay Guterres

Númeru admitidu hirak ne’e mai husi teste rejime jeral kompostu husi Ensinu Sekundáriu Jeral no Ensinu Sekundária Tékniku Vokasionál, enkuantu rejime espesial kompostu husi rejime oportunidade, bolsa hakbiit, bolsa veteranu nia oan.

Lista admitidu ba UNTL no IPB maioria okupa husi feto no feto barak mak hetan valor diak liu kompara ho mane sira.

Portantu atu haree Lista ofisial admitidu bele asesu iha iha Website : http://messk.gov.tl , www.untl.edu.tl no www.ipb.edu.tl 

Link website

Link Download file

Link Google Drive 

Portantu, Ba kandidatu sira ne’ebé mak la admitidu, sei iha periodu loron lima (5), hahu husi data anunsiu rezultadu nian, atu halo reklamasaun, ba Komisaun Assesu Ensinu Supérior (CAES-Sigla Portugés), iha Diresaun Jeral Ensinu Supérior no Siénsia – MESSK, avenida Marginal No.4, Edifisiu MESSK, Colmera Díli.

Jornalista : Marcela Lemos