Senadu UNTL Preokupa, Estudante Eskola Tinan 7-10 Seidauk Gradua

SAPNewsTL, Dili : Durante reflesaun no festa ba abertura ensinu akadémiku 2024 nian iha fakuldade Engenaria UNTL, Presidente Assosiasaun Estudantil Fakuldade Engenharia Siénsia no Teknolojia UNTL (FEST-UNTL), Sergio alves da Costa Preokupa estudante barak estuda to’o tinan 7-8 ba leten maibe seidauk gradua no balun abandona tiha.

Senadu Fakuldade Engenharia Sergio Alves da Costa husu ba komponente hotu iha UNTL liliu iha Fakuldade Engenharia hodi fasilita estudante hotu ho diak no lailais hodi nune’e estudante sira labele estuda to’o tinan 7 no 8 ba leten, até balun abandona tiha estudu.

“Husu ba Estrutura Topu UNTL, Estrutura Dekanu, Estrutura Departamentu atu bele fasilita estudante sira hotu ho didiak no lailais, atu labele kleur demais to’o eskola tinan 7-8 ba leten balun to’o 10 mos seidauk gradua, ita hotu presiza haree kestaun ne’e ho klean, tanba estudante balun abandona tiha estudu, kada tinan ita simu barak mais gradua uituan deit”. Tenik Sergio Alves da Costa liu husi nia diskursu iha Auditorium Hera, 31/01/2024

Lider estudante ne’e mos husu ba estudante hotu iha UNTL, hodi banidas estuda, lee barak, hakaas an hodi luta ba realiza ida-idak ninia mehi ne’ebe seidauk atinji, labele sai estudante ne’ebe baruk ten no la hatene esforsu, tanba joven ne’e nu’udar esperansa, fini no futuru ba familia, sosiedade no nasaun.

“Husu estudante hotu iha UNTL, ita ne’e futuru, fini no esperansa ba nasaun ida ne’e, ita tenki halakon ita nia barukten sira, ita tenki hakaas an hodi prosesa estudu ne’e ho lais no susesa tuir tempu ne’ebe determina”. Sergio sublinha

“Ita estudante fakuldade engenharia eskola iha edifisiu ne’ebe avansadu (mewa) ho laboratorium kompletu, sala de aula, biblioteka, sala estuda, entaun ita nia kunhesimentu no kapasidade mos tenki avansadu tuir saida mak ita uza no haree, laiha razaun atu ita la esforsu no susesu tanba se uluk ita nia funu nain sira no aman inan sira eskola iha fatin ne’ebe ladun sufisiente bele susesu liliu lori ita nia nasaun sai husi invazaun no livre husi injustisa no hetan ukun rasik an, tan nusa ita labele, sa mak ita sei falta, ita tenki promete ba ita nia an katak ita tenki susesu”. Sergio da Costa hateten

Senadu Fakuldade Engenharia Sergio Alves da Costa mos fo agradese ba estrutura fakukdade ho komisaun instaladora kursu mestradu ne’ebe halo esforsu lubun ida hodi to’o ona iha konkluzaun ida katak tinan ne’e loke kursu mestradu iha fakuldade  refere.

“Lori estudante fakuldade engenharia tomak ninia naran, ami hotu fo agradese ba estrutura fakuldade ho komisaun instaladora ba kursu mestradu ne’ebe halo servisu makaas tebes  hodi to’o ojin loron ita iha ona konkluzaun ida katak ita sei loke kursu mestradu iha  tinan 2024”. Dehan Sergio Alves

Iha fatin hanesan, Dekanu  Fakuldade Engenharia Siénsia no Teknolojia (FEST-UNTL), Adalfrdo da silva Ximenes hatutan Fakuldade Engenharia ohin loron bele hetan fatin ne’ebe diak ho infraestrutura adekuadu no kualidade tanba hetan apoia husi Jepan International Cooperation Ajency (JICA) iha tinan hirak ba kotuk.

Dekanu Fakuldade ne’e hateten susesu ne’e mai husi prosesu naruk ida hanesan ai oan ida ne’ebe ema kuda, hafoin nia rega bee, kuidadu no proteze nia didiak molok nia sai boot no fo fuan.

“Susesu ne’e lori prosesu naruk ida, hanesan ita kuda ai oan ida, ita presiza rega, kuidadu, proteze no haree didiak, hafoin nia bele moris buras no diak, tanba ne’e husu ita hotu atu servisu makaas hodi dezenvolve ita nia fakuldade ne’e ba oin”. Adalfredo hateten

 

Vise dekanu asuntu kooperasaun FEST-UNTL, Domingos de Sousa rekunhese kada tinan fakuldade seidauk produz graduadu tuir tarjetu ne’ebe, tan ne’e husu dosente sira hotu hodi reflesaun asuntu ne’e ba oin.

“Kada tinan ita produz graduadu seidauk tuir espetativa ita nian, por ezemplu estudante 100 iha kontizente ida, pelu menuz ita gradua 60 estudante husi 100 estudante, maibe to’o agora ita seidauk konsege, ha’u hanoin ita hotu presiza halo reflesaun didiak iha ida ne’e”. Domingos de Sousa husu

Enkuantu, iha serimonia reflesaun ne’e partisipa husi Bruder Nico, Estrutura Fakuldade engenharia Siénsia no Teknolojia, Estrutura Departamentu, dosente sira, funsionáriu sira no estrudante sira.

Jornalista : Ermelinda Soares