Atinje Sosiedade Justu, SEII & CITL Asina Akordu Dezenvolve Igualdade Jéneru
Imajem : Sekretaria Estadu lgualdade no Inkluzaun (SEll) Ho CARE Internasional Timor-Leste (CITL) asina akordu, iha Salaun SEII, segunda (06/02/23).
SAPNewsTL, Dili: Sekretaria Estadu lgualdade no Inkluzaun (SEll) Ho CARE Internasional Timor-Leste (CITL) asina akordu atu hametin kooperasaun hodi atinje igualdade jéneru no inkluzaun iha Timor-Leste.
“Akordu ne’e ami halo ho CITL tanba iha kedas dekretu lei ne’ebe fo knaar ba ami atu nune’e SEII halo advokasia hodi hala’o estratejia proteje jeneru iha politika, planu iha orsamentu no oinsa reduz violensia hasoru feto no labarik Feto, maluk Difesiente no komunidade sira sira seluk, ”Dehan SEII Maria do Rosário Fátima Correia ba jornalista iha nia kna’ar fatin, segunda (06/02/23).
Maria hatutan, akordu ho CARE Internasional mos atu servisu hamutuk hodi nune’e haree di’ak liu tan demokrasia oinsa mak atu reforsa feto nia partisipasaun iha vida ekonomia, oinsa atu fo biban mos ba feto atu foti dezisaun iha nivel nasional, oinsa bele formasaun no kapasitasaun ba feto maluk sira iha area rural atu nune’e sira mos brani kandidatu a’an ba chefe suku iha eleisaun autoridade suku nian.
Iha fatin hanesan Diretor CITL , Peter Goodfellow afirma, sira asina akordu ho SEII atu servisu hamutuk ba komunidade sira area rural luta hasoru dezigualdade
“Ami asina akordu ho SEII atu la’o hamutuk hodi halo servisu ba komunidade sira iha area rural no hamutuk ho parseiru sosiedade sivil sira atu luta hasoru dezigualdade jéneru, tanba ida ne’e hatudu ona katak, dalan efetivu ida atu kria impaktu ba dezenvolvimentu ne’ebé sustentavel asegura moris di’ak no rona feto no labarik feto sira-nia lian iha area ne’ebé rural”, tenik Peter
Peter informa, ida ne’e atinje liu husi area prioridade ha’at hanesan edukasaun, hakbit feto sira-nia ekonómia, saúde no promove feto sira-nia lian iha sosiedade liu-hosi programa dezenvolvimentu no umanitariu sira, akordu ida ne’e hametin CARE nia kolaborasaun ho SEII no iha objetivu atu foka liu tan ba prioridade mútua sira ba feto nia emporadementu ekonómia, feto nia partisipasaun iha foti desizaun, no prevensaun violénsia bazeia ba jéneru iha setor hotu iha Timor-Leste, portantu, parseria ida ne’e sei validu ba tinan rua, no ida ne’e bazeia ba komprimisiu komún atu avansa igualdade jéneru.
Nia akresenta, entidade rua ne’e iha komprimisiu atu kolabora iha inisiativa hadi’ak feto nia partisipasaun iha prosesu foti desizaun liu husi inisiativa hasa’e kapasidade sira, akonsellamentu no suporta ho rekursu hametin integrasaun jéneru iha politika, programa, no alokasaun orsamentu iha setor hotu- hotu, prevensaun no eliminasaun violénsia hasoru feto no labarik feto.
“CARE no SEII fahe vizaun hanesan konaba sosiedade ida ne’ebé igual no justu, ida ne’e hanesan onra ida atu formaliza ami nia komprimisiu atu servisu hamutuk atu atinje vizaun ida ne’e. ami sei luta hodi hetan oportunidade atu feto sira bele lidera no partisipa iha nivel hotu iha sosiedade atu inspira feto no labarik feto sira seluk atu atinje sira nia potensial tomak atu sai na’in ba foti desizaun iha futuru, ” Hakotu Peter.
Jornalista : Antonio Tilman.