Selebra Loron Mundial Feto, SEII Organiza Timor Oan Halo Doasaun Ran
Imajem Membru Falintil Forsa Defeza de Timor Leste, iha Timor-Plaza Comoro, Dili kuarta 8/03/2023
SAPNewsTL, Dili: Sekretariu Estadu Igualdade Inkluzaun (SEII) organiza Timoroan nain-25 halo doasaun ran selebra loron mundial feto iha loron 8 fulan marsu 2023 tanba ran turuk ida salva ema nia moris iha Timor-Leste.
“Atividade loron ohin SEII serbisu hamutuk saude munisipiu Dili apoiu husi banku ran husi Ospital Nasional Guido Valadares (HNGV) hodi selebra loron mundial feto iha mundu liuliu iha Timor-Leste ne’ebe monu iha loron 8 fulan marsu 2023 ne’ebe ita konvida ema hotu mai hasai ran lori ba HNGV fo apoiu ba ema hotu ne’ebe presiza liuliu maluk feto sira”, dehan reprezentante SEII Ispetora Auditoria Benigna Maria Amaral ba jornalista sira iha Timor-Plaza Comoro, Dili kuarta 8/03/2023
Benigna hatutan, doasaun ran ne’e sira loke ba publiku no sira konvida parte PNTL, F-FDTL no estudante universidade sira mai husi UNPAZ tanba sira hatene ran turuk ida salva ema nia moris tanba sira hakarak halo kontribuisaun husi loron mundial ne’e
Imajem Doasaun Ran husi F-FDTL komemora loron mundial feto
Nia informa, sira halo atividade lubuk ida hodi selebra loron mundial feto ne’e hamutuk ho parseiru sira hanesan UN Women Timor-Leste, MNEK, GMP-TL, Plan International ho autoridade Munisipiu Dili ne’ebe iha loron tolu fulan marsu 2023 sira realiza ona feira iha Casa Europa, halo abertura selebrasaun loron mundial ne’e iha loron 4 fulan marsu 2023 iha night market Timor-Plaza no iha loron 8 fulan marsu 2023 sira organiza doasaun ran iha Timor-Plaza, vizita feto maluk sira ne’ebe partus iha loron 8 fulan marsu ne’e hodi fo apoiu, halo seminariu iha kuartel jereral F-FDTL no gala diner iha salaun MNEK.
Entretantu, Timoroan sira ne’ebe ohin halo doasaun ran ne’e hamutuk nain-25 husi membru PNTL, F-FDTL, estudante no ema sivil sira.
Reportajen: Augusto dos Santos