DIT Fo Golu Ha’at Ba Nagarjo Iha Liga Timorense 2023

SAPNewsTL, Dili: DIT FC konsege halakon nia adversariu Nagarjo FC ho skore 4-0 iha jornada daruak ne’ebe ho rezultadu ne’e klube  lidera provizoriumente tabela klasifikasaun  divizaun daruak Liga Timorense epoka 2023.

Jogu DIT FC kontra Nagarjo FC hala’o iha Estadium Munisipal Dili kuarta (08/03/2023).

Iha jogu parte dahuluk bainhira kick off ekipa rua halo kedas jogu hodi kontra atake ba malu anima adeptu sira iha Estadium Munisipal Dili tanba ekipa rua hakarak manan pontu tolu maibe iha minutu 27 jogador Serafim Brito husi DIT FC marka golu hodi halo redi Nagarjo FC nakdoko hatuur kedas skore ba 1-0.

Skore refere DIT FC mantein nia jogu hasoru adversariu no sofre golu ida husi adversariu jogador husi Nagarjo FC halo presaun ba DIT FC hodi hetan oportunidade atu marka golu maibe la konsege tanba baliza adversariu asegura nia redi ne’ebe tama ba minutu 34 Nagarjo FC tenki sofre tan golu husi jogador Elvis Silva husi DIT FC aumenta skore ba 2-0 ne’ebe skore ida ne’e DIT FC lori hodi lidera minutu 45 remata.

Kontinua ba jogu parte daruak ekipa rua muda jogu tuir estratejia treinador idak-idak nian ne’ebe ekipa rua nafatin halo presaun ba malu liu husi kontra atake ne’ebe tama minutu 76 DIT FC aumenta tan golu ida husi jogador Xavier Silva Bait muda skore ba 3-0.

Maski skore 3-0  maibe jogador sira husi Nagarjo FC nafatin halo jogu hasoru ekipa adversariu hodi hetan oportunidade maibe la konsege halo golu ne’ebe tama minutu 90+2 jogador Xavier Silva Bait konsege marka tan golu hodi muda skore ba 4-0 ne’ebe jogu minutu 90 remata skore nafatin 4-0 ho rezultadu ne’e DIT FC ense golu haat ba Nagarjo FC hodi hetan pontu tolu provizoriumente lidera tabela klasifikasaun divizaun daruak Liga Timorense epoka 2023 ho pontu 6 husi jogu daruak no Nagarjo FC tenki okupa pozisaun ikus iha tabela klasifikasaun.

Depois jogu remata Treinador DIT FC Mial Armand dehan, manan iha jogu ne’e sira tarjetu tanba treinador fo hatene ba jogador sira jogu ne’e final hotu

“Tarjetu ita iha jogu ne’e manan tanba hau fo hatene ona ba jogador sira katak jogu hotu iha liga ne’e final hotu la iha jogu aban bainhira lakon ita labele hakat ba oin”, tenik Mial

Mial hatutan, ohin halo mudansa ba jogador ne’ebe jogador sira tuan hanesan Jose Santos la tama line up tanba hare’e jogador hanesan deit ne’ebe baihira deit atu tun tenki hatudu performa diak no antes treinador ne’e dehan baliza dahuluk labele tun maibe tanba baliza daruak la tuir treinu entaun hatun baliza dahuluk tanba nia treinador ne’ebe  dixiplina tebes la treinu labele joga ne’ebe nia hakarak halo iha ekipa laran ne’e iha jogador sira tenki luta para hetan fatin para bainhira fo fiar iha jogu tenki hatudu katak bele tuir sistema jogu nian bainhira la hatudu performa diak tenki troka

Iha fatin hanesan asitente treinador Nagarjo FC Nivio Neto dehan, nia jogador hatudu jogu diak hetan oportunidade barak maibe finalidade halo jogu mak la iha no DIT FC aproveita husi sala ne’ebe jogador halo hodi hatama golu haat

“Iha futebol buat hotu bele akontese maibe haree ba jogu hau nia ekipa hatudu jogu diak hetan oportunidade lubuk ida maibe finalidade atu halo golu mak la iha ne’ebe jogador DIT FC aproveita erru ne’ebe ami halo hodi marka golu haat tanba ami nia defeza menus koordensaaun”, Nivio hateten

Nivio akresenta, Instrusaun no treinu sira para jogador labele halo sala maibe dalaruma iha jogu buat hotu bele akontese ne’ebe sira iha jogu dala lima tuir mai esforsu para hetan pontu ruma.

Reportajen: Augusto dos Santos