Atleta Paralímpiku La Hetan Difikuldade, Promete Sei Konkista Medalla
SAPNewsTL, Dili: Atleta Paralímpiku halo ona preparasaun ba kompete Asian para Games iha China tinan ne’e iha Training Center (TC) otel Vila Verde durante semana rua resin maibe sira la hetan difikuldade tanba governu liu husi Ministériu Juventude Desportu Arte Kultura (sigla portuges MJDAC) fo fatin no hahan diak sira nia preparasaun.
“Daudaun ne’e ami agradese ba MJDAC fo fatin no hahan diak tebes ba atleta sira iha training center atu halo preparasaun ba Asian Para Games iha China no atleta sira simu programa treinu mos diak maski tempu limitadu los loron 49, ami la hetan difikuldade ba fasilidade sira utiliza iha training center otel Vila Verde tanba hetan fatin diak hodi akompaña atleta sira treinu”, dehan treinadora para atletizmu Cesaltina da Silva iha TC otel Vila Verde, Dili tersa (12/09/2023).
Cesaltina hatutan, ba hahan nian sira la hetan difikuldade tanba loron ida sira han dala haat dader, meudia, loraik merenda no kalan
Nune’e sira promete atleta sei hetan medalla, tanba ho training center iha otel Vila Verde loron 49,maske nune’e maibe sira ba kompete laos partisipa tanba atleta sira sei duni malu to’o lina final nian.
Programa treinu ba atleta mak dadersan tuku 05:00 halai ba Cristo Rey per kilometru mak 12 km, 10 km, 8 km no 6 km no halai mos iha Estadium Munisipal Dili dadersan 07:00, nia hakas an fo treinu ba atleta sira atu labele hakfodak atu kompete ho atleta sira husi rai liur.
Iha fatin hanesan, atleta para tenis meza Domingos Talo Mau dos Santos hatete, sira halo preparasaun husi tinan kotuk kedas hafoin mai tama TC otel Vila Verde sira preparadu kompete Asian para Games iha China tinan ne’e.
“Preparasaun ba ami atleta husi para tenis meza ne’e prepara kedas iha tinan hirak liu ba hafoin mai tama training center iha Otel Vila Verde tan ne’e ba kompete Asian para Games iha China, ami preparadu”.
“Agora sira tama iha Training center iha otel Vila Verde ne’e sira sente diak tebes no sei halo preparasaun masimu treinu ho diak tanba sira utiliza fasilidade diak”, tenik Domingos
Domingos informa tan, kona ba hahan ba preparasaun nian sira sente diak tebes tanba kompania manan tender oferese hahan diak duni tuir tenderizasaun nian sira la iha difikuldade ba hahan ho fatin hela.
Iha sorin seluk, atleta para powerlifting Antonio Jose Aniceto Serão dehan, sira hahu tama TC iha loron 28 fulan setembru 2023 durante semana rua resin ona buat hotu la’o diak tanba la hetan difikuldade iha hahan no treinu.
“Ami hahu tama training center otel Vila Verde iha loron 28 fulan agostu 2023 to’o agora semana rua resin ona buat hotu lao diak, ba hahan mos ami senti diak loron ida, ami han dala haat dader, meudia, loraik merenda no kalan, nune’e ami la hetan difikuldade ba treinu nian tanba tuir treinador nia programa, ami mos kumpri nafatin regra komisaun fo sai, han ho deskansa tuir oras no ami nia treinu hala’o iha Gym KONI iha jinajiu desportu Dili”, Antonio hateten
Antonio hato’o agradese wain ba governu, tanba tinan ne’e diak liu kompara ho tinan kotuk mezmu durante loron 49, maibe tuir lolos iha TC minimu loron 90 atu nune’e atleta sira prepara an diak tanba ba kompete jogu maibe la buat ida kondisaun governu fo mak hanesan ne’e avansa ho ida ne’e.
Entretantu, atleta paralimpiku husi Timor-Leste sei kompete Asian para Games 2023 iha China hamutuk nain-11 husi modalidade tolu, para atletizmu atleta nain haat, para tenis meza atleta nain lima no para powerlifting atleta nain 2.
Reportajen: Augusto dos Santos