Boxista Nain-204 Partisipa Kampionatu Nasional FBATL 2024

SAPNewsTL, Dili: Federasaun Boxe Amadora Timor-Leste (FBATL) realiza kampionatu nasional durante loron hitu partisipa husi boxista nain-204 husi klube 23 iha Dili no asosiasaun ualu mai husi munisipiu ualu.

“Ita nia boxista partisipa kampionatu nasional ne’e hamutuk nain-204 ba kategoria senior ho junior, nune’e senior iha boxista nain-38 ho junior nain-166 mai husi klube 23 iha Munispiu Dili no assosiasaun husi munisipiu ualu, loron kompetisaun ita hahu iha loron 13 to’o 20 fulan maiu 2024, sei deskansa deit iha loron 17 fulan maiu 2024”, dehan prezidente komisaaun organizador kampionatu nasional Boxe Amadora Timor-Leste João Eugenio C. da Silva ba jornalista sira iha jinajiu desportu Dili segunda (13/05/2024).

Prezidente komisaun informa tan, iha loron abertura dahuluk sei iha jogu 32 ba atleta junior, Loron daruak iha jogu 33 loron rua tuir sira manan ho manan hasoru malu depois tama ba loron rua sei iha jogu semifinal no final ba junior ho senior sira, boxista sira sei simu premiu ba junior ho senior diferente mak osan ho sertifikadu.

João salienta tan, kampionatu nasional ne’e objetivu komemora loron anniversariu independensia Timor-Leste nian ba 22 no halo selesaun nasional ba atleta sira ba jogu Sea Games 2025, kampionatu nasional ne’e hetan apoiu masimu husi governu liu husi MJDAC ho orsamentu montante 20.000 USD, boxista sira ne’e sei kompete iha klase 48 kg, 51 kg, 54 kg, 57 kg, 60 kg, 61 kg no 63,5 kg, iha final sei iha jogu ezibisaun ba boxista feto sira, jogu feto sira halo ezibisaun deit tanba feto sira seidauk iha preparasaun diak.

Iha fatin hanesan, Ministru Juventude Desportu Arte Kultura Nelyo Isaac Sarmento hatete, kampionatu nasional boxe ne’e iha tinan 2024 sei realiza dala rua hodi prepara boxista ba jogu Sea Games 2025.

“Kampionatu nasional boxe ne’e iha 2024, ita realiza iha fulan maiu no fulan agostu hodi prepara boxista ba jogu Sea Games 2025 iha Tailandia, nune’e ida ne’e tama programa governu nian mos hamutuk FBATL, iha fulan maiu agora ne’e realiza jogu ba boxista hotu husi junior to’o senior no iha fulan agostu ita sei iha kampionatu nasional hanesan ne’e maibe iha mos jogu ba atleta semi profesional (potensia ba profesional), ida ne’e meiu ida governu halo para hetan fini ba boxista Timor-Leste tanba boxe nu’udar modalidade prestiziu daruak iha Timor-Leste aleinde futebol”, tenik Nelyo

Nelyo hatutan tan, hein katak modalidade sira seluk tuir mai iha futuru maibe konforme federasaun sira oinsa halo programa diak para ema hotu gosta hodi hamosu tan atleta barak tanba governu sempre hamriik hodi apoiu federasaun sira hotu iha Timor-Leste maibe federasaun organiza kampionatu nasional ho organizadu ho regularmentu diak, rekursu naton no atleta barak iha Timor-Leste tanba governu nunka taka matan ba sira sempre dudu nafatin sira ba oin.

Ministru afirma tan, governu mos halo planu ona ho FBATL atu nune’e tinan ida sei iha kampionatu nasional ba boxista sira para hamosu boxista barak iha Timor-Leste tanba liu husi kampionatu nasional mak halo selesaun ba boxista reprezenta nasaun ba jogu internasional sira.

Jornalista : Augusto dos Santos