BTL, E.P No Kompanha 3 Selebra Kontratu, Bee Moos Sei To’o Ba Populasaun Hotu

SAPNewsTL,Dili : Bee Timor Leste Empreza Públiku (BTL E. P) Asina kontratu ho kompañia tolu (3) hanesan kompañia Karisma Unipesoal Lda, Kompañia Ukat Mape unipessaol Lda no kompañia Mercy Unipessoal Lda, objetivu husi kontratu ne’e hodi halo melloramentu sistema bee mos iha Timor Leste.

Tuir  Presidente BTL E.P, Carlos dos Reis  akordu ne’e atu meloramentu Sistema bee moos iha Postu Administrativu Vemasse Munisipiu Baucau,  Suku Kribas Postu Administrasaun Manatutu Villa, inklui Projeitu Fornesimentu Instalasaun Liner Tank ba Sentru Postu haat hanesan Mehara, Luro, Quelecai no Metinaru

“Ha’u espera ho lansamemtu asina kontratu ida ne’e, ita nia kompañia sira bele halo servisu no bele kria sistema bee mos ne’ebé ho kualidade ba ita nia ema sira, Semana oin tur hamutuk ho tékniku sira, nune’e bele hahú hala’o servisu”. Dehan Presidente BTL E.P, Carlos dos Reis  ba jornalista iha salaun BTL. E.P sexta feira  (14/10/ 22)

Entretantu, Kontratu Melloramentu Sistema Bee Moos iha Postu Vemase Munisipiu Baucau, entre BTL.E.P ho kompania kompania Karisma Unipessoal Lda, ho total  orsamentu USD $ 337,805.81, Kontratu Fornesimentu instalasaun Liner Tank Suku Mehara, Suku Luro, Quelecai no Metinaro, entre BTL,E.P ho kompania Ukad Mape Goll Unipessoal Lda, ho total orsamentu $339.889,37, inklui Melloramentu Sistema Bee Moos Suku Cribas Postu Administrativu Manatutu Villa, ne’ebe responsabiliza husi kompanha Mercy Unipessoal Lda ho orsamentu hamutuk $255.585,95.

Presidente Ezekutivu Bee Timor Leste ne’e afirma sei kontinua halo aprovizionamentu ho parseiru sira, nune’e bele fornese bee ba komunidade sira iha kapital Postu  Administrativu sira 14 iha tinan ida ne’e

“Ita lansa tiha ona prosesu aproviziomentu, ita kontinua asina kontratu ho ita nia parseiru sira bele ba halo servisu iha kapital Postu 14, tekniku sira ba halo tan levantamentu dadus tanba ita seidauk halo, ami nia esperansa antes fulan dezembru remata ita halo ona levantementu dadus ba kapital postu hotu-hotu”. Tenik Nia

Presidente BTL, E.P husu ba Autoridade Lokal no Xefe Suku sira husu sira hodi kontribui iha terenu, nune’e kompaña ka parseiru sira livre husi problema hodi dada bee ba populasaun sira

Iha sorin seluk, Diretor kompañia Katmapegor, Domingos de Jesus hato’o agredasesimentu ba BTL E.P nafatin fó oportunidade ba sira liu-liu area bee moos

“Ami sente orgullu ho oportunidade ida ne’e, ami mos sei promove ami nia kompañia rasik ba iha BTL E.P nia area tanba maioria ita nia povo presiza duni bee mos, tanba ne’e ami hili atu sai emprezariu ba bee”. Sublinha nia

Diretor ne’e Informa, Sira sei halo instalasaun ba tanki  liner hamutuk 8 mak hanesan Mehara ida, Luro ida, Quelecai lima no Metinaru ida, projeitu refere sei tuir tempu ne’ebe determina

“Durasaun kontratu durante fulan neen, ami prepara tanki ida ba Mehara, depois iha Postu Administrativu Quelecai tanki lima, Postu Administrativu Luro tanki ida nomós Postu Administrativu Metinaru”. Domingos hakotu.

Jornalista : Antonio Tilman

Editor       : Ekipa Editorial