CDTL Agradese, Telemor Fo Prémiu Apresiasaun
SAPNewsTL, Dili: Konfederasaun Desportu Timor-Leste (Sigla Portuges CDTL) hamutuk ho atleta nain ualu husi modalidade taekwondo, karate-do ho boxing agradese ba kompania Telemor ne’ebe Atribuí prémiu apresiasaun tanba atleta nain ualu ne’e hetan ona medalla osan metan iha Sea Games Cambodia 2023.
“Ohin ami entregra prémiu apresiasaun ba atleta sira daruak nian ba atleta sira ne’ebe hetan medalla iha Sea Games Vietnam no Cambodia tanba ida ne’e hanesan orgullu boot ba Timor-Leste”,
“Atleta sira hetan prestasaun laos hatudu rezultadu ba sira nia an deit maibe reprezenta nasaun Timor-Leste, nune’e Timoroan sira respeita imi nia servisu”, Vise Diretor Jeneral Telemor Nguyen Viet Anh ba jornalista sira iha nia knaar fatin Timor Plaza Comoro, Dili sesta (21/07/2023).
Vise diretor ne’e hatutan tan, nia lori kompania Telemor nia naran hato’o parabens no entrega premiu ba atleta sira hein katak atleta sira ne’e hetan prestasaun diak liu tan iha futuru para nafatin hamorin nasaun nia naran iha kompetisaun internasional sira hanesan Sea Games ho sira seluk.
Iha Fatin hanesan, Prezidente CDTL Macario F. Sanches hatete, ohin nia sai sasin daruak ba kompania Telemor fo bonus ba atleta prestasaun sira tan ne’e nia fo obrigadu ba kompania ne’e hein katak ba futuru sei kontinua nafatin ba oin
“Ohin, Ha’u sai sasin daruak nian ba kompania Telemor ne’ebe fo premiu apresiasaun (bonus) daruak ba atleta sira hetan medalla, iha tinan kotuk bainhira atleta sira fila husi Sea Games 2022 iha Vietnam no agora fila husi Sea Games 2023 iha Cambodia buat sira ne’e akontese tanba iha servisu hamutuk entre CDTL ho Kompania Telemor”.
“Nune’e valoriza prestasaun atleta sira nian no ita hein katak ba futuru relasaun organizasaun rua ne’e kontinua metin no forsa nafatin hodi lori desportu diak liu iha Timor-Leste”. Nia subliña
Nia fundamenta, “desportu ba ema hotu inklui kompania privadu sira ne’ebe agora inisia husi Kompania Telemor laos konfederasaun, federasaun, atleta no ema sira hadomi desportu nian deit tan ne’e ami fo obrigadu ba kompania Telemor no ba atleta sira labele orgullu ho bonus ida ne’e tanba oportunidade barak sei tuir mai hakas an para hatudu prestasaun nafatin”, tenik Prezidente CDTL
Macario informa tan, iha sira nia mandatu Timor-Leste ba dahuluk no uniku kompania privadu Telemor fo bonus ba atleta sira hetan medalla iha jogu internasional sira iha 2022 no 2023, hein katak relasaun CDTL ho Kompania Telemor la kotu iha ne’e kontinua, nune’e atleta se deit hetan prestasaun iha jogu internasional lori medalla mai
Iha sorin seluk, Atleta Boxing Edegar Foe Quintas dehan, nia senti kontente no fo obrigadu ba kompania Telemor fo ona premiu apresiasaun hodi motiva sira kompete diak liu tan.
“Ha’u senti kontente no fo obrigadu ba kompania Telemor tanba fo ona premiu apresiasaun, husi ne’e sira bele suporta, motiva no hamosu nafatin ami nia espiritu kompetitivu diak liu tan”. Nia Subliña
Entretantu, atleta nain ualu ne’e hetan premiu apresiasaun husi Kompania Telemor kada atleta ida hetan orsamentu 200 USD no atleta sira ne’e nain rua husi modalidade boxing, nain tolu husi modalidade taekwondo no nain tolu tan husi modalidade karate-do ne’ebe hetan medalla osan metan iha Sea Games 2023 iha Cambodia.
Reportajen: Augusto dos Santos