Preparasaun Ba Asian Games Namanas, Atleta Delio Preokupa Apoiu Governu

SAPNewsTL, Dili: Atleta husi Modalidade Boxing Delio A. Mouzinho no Edegar Foe Quintas halo hela preparasaun manas ba partisipa Asian Games 2023 iha sidade Hangzhou, China iha fulan setembru tinan ne’e maibe sira preokupa governu nia apoiu tanba sira seidauk tama iha Training Camp (TC).

“Ami nia preparasaun ba Asian Games ne’e ami hahu depois ami fila husi kompete Sea Games 2023 iha Cambodia Asian Games, tinan ne’e sei partisipa husi nasaun 45 diferente ho Sea Games tan ne’e”,

“Ha’u nia preokupasaun mak governu tenki tau matan lais lori ami nu’udar atleta ba hela iha fatin ida deit ka tama kazerna (Training Camp) atu nune’e ami treinu ho diak no hetan asistensia masimu husi treinador sira tanba agora ami hein hela atu tama kazerna maibe governu foun seidauk tau matan mai ami”, dehan Atleta Boxing Delio A. Mouzinho ba jornalista sira iha Timor Plaza Comoro, Dili sesta (21/07/2023).

Delio hatutan, maski agora sira iha uma ba treinu maibe la hamate vontade atu ba kompete iha Asean Games 2023 iha sidade Hangzhou, China iha fulan setembru tanba nia esperansa boot hatudu rezultadu diak

“Ami nia preparasaun ne’e, ami hala’o kedas iha fulan juñu tinan ne’e atu ba kompete Asean Games iha fulan setembru tinan ne’e no ami hein katak ami sei tama kazerna, nune’e ami treinu hamutuk no dixiplina hodi bele hetan rezultadu diak iha Asian Games”, tenik Edegar

Edegar informa, Daudaun ne’e sira mos prepara ba kompetisaun nasional boxing nian ne’ebe sei realiza iha semana oin, nia hein katak kompetisaun nasional ne’e ajuda sira nia hodi halo preparasaun ne’ebe diak liu tan

Reportajen: Augusto dos Santos