Fulan Setembru, Manny Pacquião Sei Vizita Timor-Leste
SAPNewsTL, Dili: Ministériu Juventude Desportu Arte Cultura (MJDAC) sei konvida boxista legendariu Manny Pacquião mai Timor-Leste tanba nia intensaun hakarak hari’i Pacquião boxing Camp iha Timor-Leste hodi dezenvolve modalidade boxing iha nasaun ne’e.
“Ha’u iha ligasaun diak tebes ho Manny Pacquião tan ne’e Ha’u hakarak utiliza kampionatu nasional boxing nian iha Timor-Leste para komunika boxista legendariu ne’e mai iha Timor-Leste hodi motiva ita nia boxista sira”.
“Nia hakarak tebes atu mai, nune’e nia hein karta ofisial husi Ha’u tanba nia mos intensaun hakarak hari’i Pacquião Boxing Camp iha Timor-Leste hodi ajuda ita nia atleta boxing sira no dezenvolve atleta sira iha Timor-Leste hetan prestasaun iha futuru”, dehan MJDAC ba jornalista sira iha salaun Ian Martin Balide, Dili sabadu (22/07/2023).
Ministru hatutan, nia sei koordena ho CDTL no Federasaun boxing iha Timor-Leste atu organiza Manny Pacquião mai Timor-Leste hodi bele aproveita nia vizita ne’e hetan kooperasaun balun ba dezenvolve boxing iha Timor-Leste
“Konvida boxista lejendariu ne’e para mai fahe esperensia ba boxista Timoroan sira iha Timor Leste tanba modalidade boxing potensia iha Timor-Leste hanesan ho Filipina”. Nia afirma
Nia informa tan, iha semana ida ka rua liu ba nia koalia ona ho Manny Pacquião, nia iha prontidaun tebes atu mai Timor”.
Tan ne’e hakarak kampionatu nasional boxing tinan ne’e muda ba fulan Setembru, entaun nia bele mai para atu motiva atleta sira no nia bele fahe nia esperensia husi nia, ema ida laiha buat ida to’o agora famozu iha mundu.
Reportajen: Augusto dos Santos