CDTL & CONTL Orgullu Guvernu Involve Estudante Iha Jogu Eskolar 

SAPNewsTL, DILI : Konfederasaun Desportu Timor-Leste (CDTL sigla portuges) ho Komite Nasional Olimpiku Timor-Leste (CONTL sigla portuges)  fo parabens ba atleta estudante husi munisipiu 14 ne’ebe partisipa iha jogu eskolar nivel nasional 2022 ne’ebe realiza husi governu liu husi SEJD hamutuk ho federasaun voleibol no atletizmu.

“Ha’u kontente fo parabens ba atleta estudante husi munisipiu 14 ne’ebe partisipa jogu eskolar nivel nasional 2022 ne’ebe governu liu husi SEJD hamutuk ho federasaun voleibol no atletizmu hodi kontribui ba dezenvolvimentu  federasaun desportivu iha Timor-Leste”, dehan Prezidente CDTL Macario F. Sanches ba jornalista sira iha nia diskursu iha Jinajiu Desportu Caicoli, Dili kuarta (14/12).

Prezidente ne’e akresenta,  atleta estudante sira ne’e mak sai hanesan potensial ba Timor-Leste iha dezenvolvimentu desportu, governu hahu husi eskola  ne’ebe  inisiativa lori atleta sira mai husi munisipiu, parabens ba federasaun voleibol no atletizmu hamutuk SEJD realiza kompetisaun ida ne’e

Nia garante katak eventu ida ne’e atleta sira hatudu dixiplina no kualidade diak para klube barak  hili atleta sira ne’e hodi suporta federasaun desportivu sira liuliu atletizmu no voleibol, eventu ne’e atleta sira sei hatudu kualidade ema mos Laos atu manan trofi deit maibe ba moris saudavel nian dezenvolve sai eventu kunesidu iha Timor-Leste.

Iha fatin hanesan Vise Prezidente CONTL Mateus da Cruz sente kontente tebes tanba SEJD hamutuk ho federasaun voleibol no atletizmu halo fali eventu ne’e, enkuantu nia mos fo parabens ba atleta estudante no arbitrajen sira hotu.

“Ha’u Kontente tebes, ita bele halo eventu ida ne’e tanba tinan rua ita la realiza foin mak ita realiza fali iha 2022, ha’u fo parabens ba atleta sira hotu husi munisipiu 14 no arbitrajen sira hein katak jogu ne’e sei lao furak liu tan, ha’u husu ba alteta sira iha jogu lakon manan ne’e normal maibe importante tebes mak hatudu jogu diak”, tenik Mateus

Entretantu, minisipiu sira ne’ebe partisipa iha jogu eskolar nivel nasional ne’e mak Lautem, Baucau, Manatuto, Viqueque, Dili, Aileu, Ainaro, Manufahi, Covalima, Ermera, Liquisa, Bobonaru, Atauru no RAEOA ne’ebe mai ho atleta  feto mane nain-20 husi modalidade voleibol no atletizmu ho treinador no ofisial na’in haat no eventu organiza husi SEJD hamutuk federasaun voleibol no atletizmu Timor-Leste.

Reportajen: Augusto dos Santos