CI Ofisializa Prémiu Max Stahl, Virgilio Husu Jornalista Defende no Promove Direitu Umanu
SAPNewsTL, DILI: Conselho de Imprensa Timor-Leste (CI) liuhusi ninia plenaria foin dadauk ne’e halo ona deliberasaun ho Numeru 07/2022, de 06 de Maio, hodi halo prémiu jornalizmu foun ho naran Prémiu Max Stahl ho kategoria dokumentariu di’ak-liu ba asuntu direitu umanu
Iha konferénsia imprensa Prezidente CI, Virgilio da Silva Guterres hateten prémiu ne’e nu’udar onra no apresiasaun ba Jornalista Naran Boot, Max Stahl ne’ebé kontribui ona ba luta libertasaun nasional ba Timor-Leste nia ukun rasik-an liu husi misaun lulik jornalizmu iha pasadu.
“Desizaun ba Prémiu foun ho naran Max Stahl ne’e Conselho de Imprensa foti liuhusi plenária ho ida-ne’e ita delibera kedas no publika ona iha Jornal da Républika. Tan-ne’e, ohin Conselho de Imprensa uza biban ida-ne’e ho publikamente hato’o katak ita iha tan prémiu jornalizmu foun ba jornalista Timor-oan sira atu aplika״. Tenik Presidente Virgilio da Silva Iha Edifisiu CI, Quintal-Boot Dili, 21/06/2022
Prémiu ne’e ita tau naran Max Stalh tanba Saudozu Max Stahl nu’udar jornalista naran-boot ne’ebé kontribui ona ba Timor-Leste nia independénsia liuhusi ninia obra jornalistika iha tempu okupasaun militar Indonézia nian
ʺPrémiu foun ne’e nu’udar oportunidade di’ak ba jornalista, kanal midia no asosiasaun jornalista sira atu kontinue promove no defende direitu umanu iha pais demkoratiku ida-ne’e, liuliu nafatin promove liberdade imprensa no liberdade espresaun atu sidadaun Timor-Oan hotu-hotu ninia direitu ba informasaun, edukasaun, saude, bee no saniamentu garantidu iha pais foun ne’e״. Nia afirma
Entertantu, desizaun hodi hamosu premiu foun Max Stahl ne’e mos bazeia ba Lei Komunikasaun Sosial, Artigu 44 no Projetu Rezolusaun Parlamentu Nasional nimeru 83/V (4*) institui Prémiu Max Stahl nu’udar rekonesimentu ba Saudozu Max Stahl nia luta ba libertasaun nasional liuhusi ninia obra jornalistiku sira
Enkuantu, CI nu’udar entidade independente Estadu nian, harii iha 10 Maiu 2016 bazeia ba Lei Komunikasaun Sosial, Nu: 5/2014, Fulan-Novembru atu promove liberdade imprensa no Liberdade espresaun no independénsia liu husi meiu komunikasaun sosial nian husi influénsia no interese hotu-hotu.
Jornalista : Vinsensius Morais
Editora : Vitoriana Brites