CNC Rekonhese Papel Mídia Importante Ba Prezervasaun Memoria

Imajem : Diretor Relasaun External CNC Gaudencio S. Sousa iha edifisiu Konsellu Imprensa Kintal Boot, Dili kuarta (24/04/2024).

SAPNewsTL, Dili: Centro Nasional Chega (CNC) rekonhese papel mídia sira importante ba prezervasaun memoria pasadu no fatin istoriku sira iha Timor-Leste tanba liu husi publikasaun ema barak bele hatene istoria pasadu sira.

“Ita hotu hatene mídia iha papel importante hodi tulun ba prezervasaun memoria pasadu Timor-Leste nian tanba rai ne’e iha autor funu ba ukun rasik mos barak, daudaun autor sira idade hotu ona ita hein katak media sira bele publika autor sira nia memoria pasadu sira liuliu ba akontesimentu importante sira hanesan masakre 12 Novembru no masakre sira seluk”, dehan diretor relasaun external CNC Gaudencio S. Sousa ba jornalista sira iha edifisiu Konsellu Imprensa Kintal Boot, Dili kuarta (24/04/2024).

Diretor hatutan, iha instituisaun barak hare’e ba asuntu pasadu nian maibe jornalista husi media sira mak bele kontribui diak liu tan, ida ne’e diak tebes alende kontribui ba prezervasaun memoria ema nian bele mos halo kampaña fatin istoriku sira liga ba memoria.

Daudaun ne’e fatin istoriku barak iha Timor-Leste liuliu iha Dili balun hetan ona transformasaun, hein katak jornalista sira halo kampaña kona ba prezervasaun fatin istoriku sira hodi asegura memoria pasadu sira labele lakon iha fatin istoriku sira ne’e, nune’e governu tau atensaun para labele sobu fatin sira ne’e tan deit interese ba dezenvolvimentu.

Nia informa tan, liu husi memoria pasadu ema nian ho fatin istoriku sira bele kontribui istoria Timor-Leste nian hatudu ba jerasaun foun sira liuliu estudante sira katak memoria hirak ne’e mak eventu boot sira akontese, fatin ba detensaun ho torturasaun no fatin ba ema lakon vida tanba kauza ba Timor-Leste ninia independensia.

“Hein katak jornalista sira bele fo sai kona ba sobrevivente sira memoria pasadu sira, karik oras ne’e sei prezerva hela dokumentu istoriku sira no fotografia sira atu nune’e oinsa sira bele fo ba CNC ka AMRT no instituisaun sira prezerva memoria pasadu sira para bele kontribui ba narativa istoria sira”.

Gaudencio afirma tan, CNC kontinua hala’o prezerva memoria pasadu ho media sira nune’e sira introdus ona ba ema ida istoria ida no suku ida istoria ida kona ba oinsa organiza klandestina ho oinsa sira tulun FALINTIL sira iha prosesu libertasaun ukun rasik an.

Daudaun ne’e Timor-Leste menus iha narativa istoria sira tanba Timoroan barak gosta konta oral deit sira seidauk dokumenta didiak liu husi hakerek maibe ema ruma bainhira hakerek sei hamosu balansu narativa, ba futuru la hare’e deit ema boot sira nia istoria maibe hare’e mos istoria ema baibain sira kontribui mos ba independensia Timor-Leste nian.

Reportajen: Augusto dos Santos