Dalan Ba Festa Demokrasia, CNE Rejista ParPol 24 Kompete Iha ElPar 2023
imajem Bandeira Partidu politiku ne’ebe registadu iha CNE
SAPNewsTL, Dili: Relasiona ho Eleisaun Parlamenta ne’ebe sei akontese iha Loron 21 Fulan Maiu 2023, Comisão Nacional Eleição (CNE) rejista ona partidu politiku 24 kompete iha eleisaun parlamentar (ElPar) tinan ne’e.
“CNE rejistu ona ita nia partidu politiku (ParPol) ne’ebe eziste hodi konkore iha eleisaun parlamentar tinan ne’e hamutuk 24 mak partidu APNT, KUNTHO, PST, CNRT, UPF, PDR, PD, UDT, PDC, MLPM, PLP, UNDERTIN, PUDD, PTD, FRENTE-MUDANSA, PSD, CSDT, PND, FRETILIN, PNDA, PDRT, LUZ-VERDES no PLPA, partidu sira ne’ebe la konkore tanba estatu lakon mak hanesan KOTA, ASDT, PTT, PNT, PUN, PDL no PARETIL”, dehan Vise Prezidente CNE Odete Maria Belo ba jornalista sira iha edifísiu CNE Caicoli, Dili kuarta (15/02/2023).
Vise-Prezidente hatutan, CNE hanesan orgaun supervizor hodi garante eleisaun ne’e lao ho diak tanba sira iha prinsipiu importante tuir lei no CNE mos hala’o supervizaun ba resensiamentu partidu iha territoriu tomak hodi tuir eleisaun parlamentar, iha loron 13 fulan fevereiru tinan ne’e Prezidente Republika dekreta ona lei ba loron eleisaun parlamentar iha loron 21 fulan maio tinan ne’e.
Imajem komunikadu Imprensa Vise Prezidente CNE Odete Maria Belo, iha edifísiu CNE Caicoli, Dili kuarta (15/02/2023).
Odete informa, CNE hala’o mos supervizaun ba rekrutamentu brigada no polinstaff sira, sira hala’o mos enkontru workshop ho funsionariu CNE sira atu koalia konaba problema no dezafiu sira ne’ebe hola parte iha eleisaun nian bele prepara aan. bele melora diak liu tan supervizaun CNE nian, CNE mos halao ona sorumutu ho entidade oi-oin hanesan parte seguransa, sosiedade sivil, NGO no mos parte igreja nian hodi bele fo moral no hanoin ne’ebe konstrutivu atu bele garante iha prosesu eleisaun parlamentar
Nia akresenta tan, Tuir lei parlamentar numeru 9/2017 iha artigu 18 hatete STAE tenki halo publikasaun ba kalendariu operasional eleisaun parlamentar depois data markasaun nian iha loron 13 to’o 21 fulan maiu entaun iha loron 8 nia laran STAE tenki publika iha jornal da republika depois de ida ne’e STAE tenki mai aprezenta iha CNE atu bele hetan kolaborasaun diak, liu husi preparasaun ba eleisaun parlamentar
Enkuantu, CNE hala’o koperasaun ho parte igreja hodi hala’o orasaun domingu-domingu atu bele asegura prosesu eleisaun ne’e, maibe la’os liu husi orasaun ne’e hodi labele mosu problema maibe fiar nu’udar ema katolika tenki husu nai maromak nia tulun wainhira hala’o prosesu ruma maibe koalia konaba antisipasaun ba eleisaun fila fali ema ida-idak nia karakter rasik.
Entretantu, Hafoin presidente da republika Jose Ramos Horta marka data eleisaun, Partidu politiku sira hahu halo ona preparasaun no konslidasaun hodi hasoru kampanha no eleisaun Parlamentar 2023
Jornalista : Antonio Tilman