Dalan Ba Selebra Loron 12 Agustu, APFTL Kuda Ai-Parapa Iha Metinaru

SAPNewsTL, Dili: Alumni Parlamentu Foinsa’e Timor Leste (APFTL) hamutuk ho organizasaun juvenil Joven Hadomi Natureza (JHN) no estudante Universidade Nasional Timor Lorosae (UNTL) Realiza atividade kuda Ai-parapa iha areadores Metinaru, Prezidente APFTL Zaulino Gomes da Silva haktuir sidadaun hotu tenki kontribui no luta hodi konserva mudansa klimátika iha Timor Leste liu husi kuidadu no kuda ai-horis sira

“Mudansa klimatika ne’ebe mak iha no mosu tuir tempu dalaruma hamosu rai manas, mesmu ita nia rai ki’ik maibe la bele hanoin katak ita mos labele atu hadia, ita mos tenki konserva ai-horis sira ne’ebe mak kompetensia no kuidadu ai-horis sira nune’e bele fo moris di’ak ba ita nia komunidade sira”,Tenik Prezidente APFTL Zaulino Gomes da Silva ba Jornalista sira iha Metinaru, 05/08/2023

Lider APFTL ne’e akresenta, ai-horis sira ne’ebe satan netik bee bainhira hamosu inundasaun ruma no mos bele fo moris di’ak ba balada ne’ebe mak moris iha tasi laran, entaun kuda ai-parapa ida ne’e hodi fo protesaun ba tasi, nune’e ita nia tasi bele moos no bele satan buat barak husi tasi”.

Zaulino hatutan, atividade kuda ai-parapa ne’e hodi komemora loron juventude nian iha loron 12 Fulan Augustu 2023, liu husi atividade ne’e fanun joven sira oinsa bele kontribui hamutuk ba kuidadu no kuda ai-horis

“Atividades refere hodi realiza mos komemorasaun loron juventude nian ne’ebe mak sei akontese iha loron 12 fulan Augustu tinan 2023, kuda ai-parapa ida ne’e ho objetivu bo’ot ida oinsa mak tulun juventude sira hodi fo sira nia kontribuisaun iha area florestal, tanba ita nia komunidade sira barak nafatin kontinua estraga ai-horis barak,”   Dehan Zaulino

“Dala barak ita nia komunidade sira tesi ka estraga ai parapa maibe sira la hatene husi ai-parapa ne’e fo benefisiu di’ak ba ita ne’ebe mak hela besik iha tasi ninin, dezenvolvimentu ne’ebe mak karik la’o ho di’ak ona ita mos tenki fo espasu ba ai parapa sira ne’ebe moris iha tasi ninin, ita hotu hare ita nia Portu Dili projetu refere hari’i konsege estraga ai horis ne’ebe mak barak tebes, nune’e ema la bele oho ka tesi estraga ai parapa sira, tanba Ai-parapa ne’e bainhira kuda nia atu bo’ot ne’e presiza tempu naruk mak nia foin bo’ot ”.

Iha fatin hanesan, Estudante UNTL Arminha Gaio Alves Pereira konsidera atividade kuda Ai-Parapa ne’e diak tebes no importante ba dezenvolvimentu ambiental iha Timor Leste liliu iha area tasi-ibun sira

“Atividade kuda ai-parapa ne’e hanesan atividades sira ne’ebe mak diak tebes ba joventude sira, tanba ita hatene katak kuda Ai-parapa ninia vantazen barak tebes ba komunidade sira no ekosistema sira iha tasi-laran”dehan estudante UNTL.

“Programa ne’e hanorin ona joven no estudante sira oinsa mak atu kuda Ai-parapa ne’ebe bele fo vantazen diak ba komunidade sira ne’ebe mak hela besik iha tasi, hanesan joven ita la persija halo asaun ne’ebe mak boot maibe ita bele hateten ba ita nia komunidade no maluk sira, nune’e la bele tesi ai-horis arbiru no ita ne’ebe hatene oinsa atu kuidadu no   fo ezemplu diak ba ita nia mos komunidade sira,”nia hatete

Estudante UNTL ne’e mos husu ba joven sira no komunidade sira hodi labele soe foer arbiru iha tasi no mos fatin sira seluk tanba liu husi foer ne’ebe mak soe arbiru mak sei fo mos impaktu ba ai-horis sira no mos fo impaktu ba balada sira ne’ebe mak moris iha tasi laran.

Entretantu viveirus Ai-parapa ne’e  sosa husi kontribuisaun estudante nian, iha ne’ebe kada estudante kontribui osan ho montante $0.50 centavus hodi sosa ai-parapa nune’e bele kuda iha areadores tasi nian, Ai-parapa ne’ebe estudante sira sosa hodi kuda hamutuk viveirus 150 Ai-parapa ho osan total $  75 Dolares.

Reportazen : Lidia Amaral & Zenoveva Lopes