Derrota Kontra Emmanuel 8-2, Aitana Degrada Ba Divizaun Daruak
Imajen: Jogador Sira husi Emmanuel FC Selebra Golu Marka Ba Redi Aitana FC Iha Estadium Munisipal Dili Domingu (30/04/2023).
SAPNewsTL, Dili: Aitana FC derrota kontra Emmanuel ho skore 8-2 FC iha jornada ikus divizaun dahuluk Liga Timorense epoka 2023 nune’e Aitana FC tenki degrada ba divizaun daruak ba liga epoka tuir mai.
Jogu Aitana FC kontra Emmanuel FC hala’o iha Estadium Munisipal Dili domingu (30/01/2023).
Iha jogu parte dahuluk jogador sira husi ekipa rua halo kedas presaun no atake ba malu nune’e jogu foin tama minutu 3 jogador Emmanuel FC Edit Savio marka golu halo redi adversariu nakdoko hodi hatuur kedas skore ba 1-0, tama ba minutu 10 Aitana FC responde kedas golu Emmanuel FC husi jogador Jilson dos Reis muda kedas skore ba 1-1.
Imajen: Rezultadu Jogu Emmanuel FC Manan Aitana FC Ho Skore 8-2.
Skore refere halo ekipa rua nia jogu lao manas liu tan tama ba minutu 21 jogador Emmanuel FC Edit Savio marka tan golu hodi muda fali skore 2-1, tama ba minutu 31 jogador Emmanuel FC João de Sousa hatama tan bola ba redi adversariu nian muda skore ba fali 3-1 nune’e skore ne’e mantein to’o jogu minutu 45 jogu parte dahuluk remata maski jogador sira husi Aitana FC tenta atu marka tan golu maibe jogador sira husi adversariu la fo oportunidade nune’e Emmanuel FC lidera parte dahuluk ho skore 3-1.
Kontinua ba jogu parte daruak nian ekipa rua muda estratejia nune’e sira nafatin halo atake no presaun ba malu, tama ba minutu 53 jogador Emmanuel FC Angelito Tilman marka golu hatuur skore ba fali 4-1, tama ba minutu 55 Aitana FC tenki menus jogador ida tanba Rigeberd Lay hetan kartaun mean maibe tama ba minutu 66 Aitana FC marka tan golu husi jogador estranjeiru Mamouddou Conde muda fali skore ba 2-4, la hein kleur Emmanuel FC marka golu rua tuirtuir malu iha minutu 69 no 71 husi jogador Emmanuel FC Alexandre Morreira muda kedas skore ba 6-2.
Skore 6-2 ne’e halo Aitana FC halo jogu nafatin hasoru Emmanuel FC atu hamenus skore maibe tama ba minutu 80 Aitana FC tenki sofre tan golu husi jogador Emmanuel FC Fretelino dos Santos muda fila fali skore ba 7-2 no tama ba minutu 90 +2 jogador Emmanuel FC João de Sousa marka tan golu muda fali skore ba 8-2 nune’e skore ne’e mantein to’o jogu minutu 90 remata nune’e skore ne’e rezulta Emmanuel FC manan jogu ho skore boot kedas hodi hetan pontu tolu okupa pozisaun daruak iha tabela klasifikasaun divizaun dahuluk Liga Timorense epoka ne’e ho pontu 15 no derrota ne’e halo Aitana FC tenki degrada ba divizaun daruak Liga Timorense epoka oin mai tanba okupa pozisaun ikus liu iha tabela klasifikasaun divizaun dahuluk Liga Timorense epoka 2023 ho pontu 4.
Depois jogu remata asistente treinador Emmanuel FC Van Basten dehan, ohin sira remata jogu ho vitoria kontra Aitana FC maibe la satisfaz ba orgaun LFTL organiza sira nia jogu ne’e.
“Ohin ami remata ami nia jogu ikus iha Liga Timorense epoka 2023, ami hetan vitoria kontra Aitana FC ho skore 8-2 maibe ami la satisfaz ho ami nia jogu ikus tanba orgaun LFTL la halo tuir kriteria profesional baibain ita halo hanesan hare’e jogador sira nia naran no la la hare’e jogador iha fatin troka nian ami mai hanesan joga iha aldeia cup ne’e, tan ne’e ami sente orgaun liga la iha seriedade organiza liga ba epoka ne’e”, tenik Basten
Van Basten hatutan, jogu ohin sira hakarak tau sira jogador suplente sira maibe sira hakarak hatudu ba orgaun LFTL jogu iha divizaun dahuluk hotu-hotu hanesan laos hetan ona Karketu Dili FC kampiaun ona ne’ebe sira nia jogu ne’e kriteria profesional baibain orgaun LFTL ne’e paradu ona, ida ne’e sei fo impaktu ba liga epoka tuir mai nune’e sira hakarak husu ba orgaun LFTL hadia atu nune’e ba jogu tuir diak liu tan.
Iha sorin seluk treinador Aitana FC Jose Fonseca hatete, sira nia rezultadu jogu mak nune’e Aitana FC tenki degrada ba divizaun daruak maibe sira husu ba orgaun liga tau kestaun sira ne’e ladiak no labele tanba buat sira fo influensia boot ba futebol Timor-Leste rasik
“Ita nia rezultadu jogu mak hanesan nune’e derrota ne’e Aitana FC tenki degrada ba divizaun daruak ba liga epoka tuir mai maibe husu para orgaun tenki tau kestaun ba buat ne’ebe ladiak, labele ne’e halo didiak, liga tenki tau ida ne’e ba referensia selae liga sei la garantia fubebol Timor-Leste ho situsaun sira ne’e tanba kestaun sira infleunsia boot la liga rasik”, Jose hateten
Imajen: Tabela Klasifikasaun Hafoin Emmanuel FC Manan Aitana FC Ho Skore 8-2.
Entretantu iha jogu Aitana FC kontra Emmanuel FC ne’e ekipa rua halo substituisaun ba jogador nain lima, jogador Aitana Rigeberd Lay hetan kartaun mean iha minutu 55 no Emiliano Parada hetan kartaun kinur no jogador Sandro Quintão ho Fretelino dos Santos husi Emmanuel FC mos hetan kartaun kinur.
Reportajen: Augusto dos Santos