Do’ok Husi Sentru Saúde Ho 18 KM, Inan Isin Rua Partus Iha Dalan Lelalai
Imajem : Inan Isin Rua ne’ebe familia transporta husi Suku Lelalai Postu Administrativu Quelecai, Munisipiu Baukau, 01/05/2023
SAPNewsTL, Baucau: Inan Isin Rua ida iha Suku Lelalai, Postu Administrativu Quelecai família transporta deit ho kadeira ba Sentru Saude Postu Kelekai tanba Kondisaun Estrada Ladiak, Maibe Felizmente iha Inan refere Konsege partus ho Kondisaun normal iha família ida Nia uma
“Inan Isin rua ne’ebé família lori ba ho kadeira husi Suku Lelalai ba Sentru Saude Postu Administrativu Kelekai, Konsege partus iha dalan klaran (Familia ida Nia uma), família lori ba deit ho kadeira tanba estrada Aat difikulta Ambulánsia Labele To’o iha Suku refere hodi Transporta Pasiente”. Informa Sefe Suku Lelalai Salamão Frago Fernandes liu husi via telefone ba Jornalista SAPNewsTL, Quelecai, 01/05/2023
Sefe Suku Lelalai informa, Inan Isin Rua Nee Hela iha Suku Lelalai Ne’ebe dook Husi Sentru Saude Postu Kelekai maiz ou Menuz 18 Kilometru, estrada Aat prejudika Ambulánsia Labele to’o iha fatin hodi lori inan isin rua refere
Salomão Frago fundamenta, Sentru Saude Suku Lelalai halo Ona Survey Dala rua atu halo Ninia Konstrusaun ho dezenhu no BOQ Ne’ebe kompletu maibe tanba Kestaun laiha Osan, Ikus mai labele ezekuta
“Sentru Saude Suku Lelalai halo ona survey Dala rua, iha ona dezenhu no BOQ, halo ona rekomendasaun Dala barak Maibe to’o ohin loron seidauk tenderizasaun no Konstrusaun, ikus Mai Komunidade sira kontinua halerik ba saúde no Estrada, tanba ne’e Ha’u husu ba Ministério Obras Públicas no Ministério Saúde hodi resolve problema estrada no Sentru Saude iha Suku Lelalai”. Nia husu
Nia akresenta, Komunidade Lelalai tinan 21 Ida Ona kontinua halerik ba Estrada, Laiha Sentru Saude liliu klinika, laiha pessoal saúde, laiha fasilidade no Menuz Atensaun husi estadu Timorense
Inan Isin Rua ne’ebé Konsege partus iha dalan, agora Daudaun sei Hela provizoriu iha família ida durante loron tolu, hafoin sei ba halo tranmentu iha Sentru Saude Postu Administrativu Quelecai, Portantu Inan Isin Rua Nee agora Daudaun iha Hela kondisaun saúde ne’ebé Diak.
Jornalista: Luis Pailofo