Dom Leandro Ordena Viqueque Oan Na’in 2 Sai Na’i-Lulik

SAPNewsTL, Viqueque: Hafoin fo ordenasaun saserdotal ba Diakonu nain rua iha Parokia Viqueque, Bispu Dioseze Baucau Dom Leandro Maria Alves hateten sira hakmatek hela tanba la’o tuir dalan ne’ebe los.

Bispu Dioseze Baucau Dom Leandro Maria Alves iha missa solene ne’e afirma sira ne’ebé simu ordenasaun ne’e sira laran hakmatek tanba sira tuir dalan los, dalan maromak nian no familia sira entrega ba kreda ho matan been ksolok nian.

“Padre na’in rua ne’e laran hakmatek hela tanba sira la’o iha dalan ne’ebe loos, familia sira mai tau konfiansa tomak ba igreja, familia sira entrega ho matan been maibe ne’e matan been ksolok nian la’os matan been triste nian”. Dehan Bispo Dioseze Baucau Dom Leandro Maria Alves iha Parokia Nossa Senhora Imaculada Conceição – Viqueque, 8/12/2023

Bispo Baucau ne’e mos haktuir sira hakmatek maske halo servisu iha fatin hotu maibe ida ne’e hatudu katak sira foti desizaun tuir maromak nia bolu la’o tuir dalan los dalan maromak nian.

“Nune’e mos Amo nain rua sira hakmatek los mezmu ke sira hala’o servisu iha fatin fatin hatudu katak sira tenke la’o iha dalan ne’ebe Na’i maromak bolu, sira deskobre ona ida ne’e i sira foti ona desizaun, sira hatan sim hanesan Maria atan há’u mak ne’e atu halo tuir de’it ita nia liafuan”. Nia teni

Bispo Dom Leandro konsidera maromak haraik grasa ba ema hotu no sira tuir ona dalan los ne’ebe matan been ne’ebe tun hanesan matan been agradese nian ba maromak

“Sira sei metin tanba ita bele dehan mai husi maromak fila fali ba maromak, matan been tun ne’e matan been agradese nian, agradese ba maromak ba grasa ne’ebe haraik ba familia, maromak haraik grasa ba ema hotu, oinsa mak ita bele koloka, inan/aman sai dalan, sai naroman ba oan sira atu bele deskobre maromak nia konvite ne’ebe tau ba ema ida-idak”. Bispo hateten

Padre Ordenadu, Waldimiro A. Viana sente kontente tanba bele realiza ona mehi sai na’i lulik hodi servi sarani sira, sente haksolok tanba ho maromak nia grasa liu husi esforsu naruk no luta naruk bele konkista sai padre

“Uluk nana’in ha’u sente ksolok tebes tanba ho grasa Maromak nian liu husi esforsu naruk bele realiza ona mehi sai Na’i Lulik, Na’i Lulik ne’e hanesan estadu de vida ida laos hanesan opsaum ne’ebe ita hili maibe estadu de vida ne’ebe ita atu servi.”

“Tan ne’e ha’u espera imi bele reza ba ha’u hodi sai Na’i Lulik ne’ebe fiel no firme hodi servi Maromak nia povu”. Padre Waldimiro A. Viana hateten

Entretantu, Diakonu nain rua ne’ebe simu ordenasaun presbiteral ne’e Dc. Justino A. de Aquino no Dc. Waldimiro A. Viana husi Viqueque no Frater nain haat ne’ebe simu ordenasaun diakonal ne’e mak Fr. Alberico da Costa husi Lautem, Fr. Canisio de Carvalho husi Uatulari, Fr. Domingos Batista Fonseca husi Soibada no Fr. Helder do Carmo Gomes Henriques husi Manatuto

Jornalista : Luis Pailofo