Familia Tanis ! Dom Leandro : Ne’e Matan-Ween Ksolok & Agradese Nian

SAPNewsTL, Viqueque: Bispu Dioseze Baukau Dom Leandro Maria Alves fo ordenasaun saserdotal ba Diakonu nain rua no ordenasaun diakonal ba Frater nain haat iha Parokia Viqueque.

 

Bispu Dioseze Baucau Dom Leandro Maria Alves hateten sira hakmatek hela tanba la’o tuir dalan ne’ebe los, familia sira hamonu matan been maibe ida ne’e nu’udar matan been ksolok no matan been agradese nian

Tuir homilia Bispo Dioseze Baucau Dom Leandro Maria Alves iha missa solene ne’e informa sira ne’ebé simu ordenasaun ne’e sira laran hakmatek tanba sira tuir dalan los dalan maromak nian no familia sira entrega ba kreda ho matan been ne’e nu’udar matan ksolok nian.

“Diakonu nain haat ne’e laran hakmatek hela tanba sira la’o iha dalan ne’ebe loos, familia sira mai tau konfiansa tomak ba igreja ida ne’e ami entrega ona, familia sira entrega ho matan been maibe ne’e matan been ksolok nian la’os matan been triste nian”. Dehan Bispo Dioseze Baucau Dom Leandro Maria Alves iha nia homilia iha Parokia Nossa Senhora Imaculada Conceição – Viqueque, 8/12/2023

Bispo Dom Leandro hatutan maromak haraik grasa ba ema hotu no sira tuir ona dalan los ne’ebe matan been ne’ebe tun hanesan matan been agradese nian ba maromak ne’e haraik grasa ba familia.

“Sira sei metin tanba ita bele dehan mai husi maromak fila fali ba maromak, ne’ebe matan been tun ne’e matan been agradese nian, agradese ba maromak ba grasa ne’ebe haraik ba familia, maromak haraik grasa ba ema hotu, oinsa mak ita bele koloka, inan/aman sai dalan, sai naroman ba oan sira atu bele deskobre maromak nia konvite ne’ebe tau ba ema ida-idak”. Bispo hateten

Bispo Baucau ne’e mos haktuir sira hakmatek maske halo servisu iha fatin hotu maibe ida ne’e hatudu katak sira foti desizaun tuir maromak nia bolu, la’o tuir dalan los dalan maromak nian.

“Nune’e mos Amo nain rua sira hakmatek los mezmu ke sira hala’o servisu iha fatin fatin hatudu katak sira tenke la’o iha dalan ne’ebe Na’i maromak bolu, sira deskobre ona ida ne’e i sira foti ona desizaun, sira hatan sim hanesan Maria atan há’u mak ne’e atu halo tuir de’it ita nia liafuan”. Nia teni

Entretantu, Diakonu nain rua ne’ebe simu ordenasaun presbiteral ne’e Dc. Justino A. de Aquino no Dc. Waldimiro A. Viana husi Viqueque no Frater nain haat ne’ebe simu ordenasaun diakonal ne’e mak Fr. Alberico da Costa husi Lautem, Fr. Canisio de Carvalho husi Uatulari, Fr. Domingos Batista Fonseca husi Soibada no Fr. Helder do Carmo Gomes Henriques husi Manatuto.

 

Partisipa iha misa solenidade ne’e, familia husi ordenadu sira, sarani sira husi Dioseze Baukau, Autoridade Lokal sira iha munisipiu Viqueque, Padres, Madres, Frater sira, Diakonu sira no leigus sira.

Iha biban ne’e mos sarani Parokia Imaculada Conceição Viqueque selebra aniversáriu ba dala XXXVI, antes ne’e Bispu Dom Leandro Maria Alves mos sakramentu krisma ba Krismante hamutuk atus lima resin no inaugura kapela Nossa Senhora Maria dos Anjos Uetali Parokia Viqueque.

Jornalista : Luis Pailofo