Happy Valentine’s Day ! Domin Lolos Hanesan Tasi Ne’ebe Simu Fo’er Husi Mota

SAPNewsTL, Dili : Perspektiva Estudante Universidade da Paz (UNPAZ) Gregorio Fidelis Colo kona ba loron domin nian iha mundu rai-klaran liliu iha rai doben Timor Lorosa’e.

Introdusaun

Ohin loron ema hotu selebra ka memoriza fila fali Valentine’s Day hanesan loron históriku ida iha mundu tomak mai ho nia signifikadu katak loron domin ka dia dos namorados ou dia do amor.

Domin sai hanesan dalan ida ba ema hotu atu respeitu malu no kuidadu malu iha tempu ne’ebe defisil maski mosu emosaun nebé ita la espera maibe tenki uza konsiensia hodi hakalma an ho domin nebé uza fuan. Tamba ne’e, uainhira ita ko’alia konaba Valentine’s Day iha perspetiva sientista balun, ita labele haketak liafuan domin tamba domin mak sai nudar ponte ka pontu kulminante ida nebé importante tebes no sai dalan úniku ida iha mundu ne’e.

Hó ida ne’e hakerek na’in hakarak esplika simples de’it konaba oinsá ema hotu bele selebra Valentine’s Day iha ambiente nebé sakrifika nia intelektualidade ho misaun ida nebé Sto. Valentino halo katak Domin la’os deit hadomi maibé tenki iha mós atu komprende konaba maneira sira seluk no buka saida mak acto husi Hadomi ne’e. Dala wain ita belun balu dehan katak domin ne’e ita labele esplika ho razaun nebé puro. Husi tendensia ida ne’e, ikus mai lori ita ba hanoin ida no halo intepretasaun oioin hodi prátika iha asaun dehan katak”O amor não é o pecado mas o acto de amor é o pecado”.

Ita imajina to’ok katak acto de amor ne’e hanesan pecado ida. That is illogical! Actu de amor nunka sai pekadu ida. Hó pensamentu hirak ne’e, mai ita reflete hamutuk no tau importansia hodi hatene no komprende Valentine’s Day nia existe tamba sakrifika nia an nudar domin nebé perfeito ba ema hotu iha mundu. Domin ne’e nia ezistensia dura no permanese iha ema hotu nia(vida quotidiano) moris loron-loron nian.

Domin existe tamba Moris Sakrifisiu

Ita Ema kontente tamba ho espiritu Maromak nia domin no ita iha Inan no Aman, Familia sira no belun barak tantu Feto no Mane, seluk mak ita nia Doben iha  viagem moris loro-loron. Ema hotu hatene katak loron domin nia existe tamba moris sakrifika an, Valentine’s Day dedika espesial mai ita atu reflete fila fali ita nia hahalok domin nian nebé mak ita partilha ona ba ita nia maluk sira.

Tamba ne’e, ha’u mai ho espresaun simples ida katak”Koko atu sai ema nebé di’ak maibé se senti katak ó di’ak keta sai foti an”; Hó espresaun ida ne’e lori ita atu labele arogansia tenki hatudu ita nia maturidade nebé di’ak ba ema hotu nia matan ho dalan nebe di’ak ka dalan ne’ebe ita dehan pasiensia tamba “ita pasiensia la’os sai hanesan ita nia fraqueza maibé pasiensia mak hatudu katak ita iha Domin”.

Wainhira ita koalia konaba Domin signifika ita hanoin kedas Na’i Maromak tamba nia mak domin nia hun lolós nebé mak nia hatudu liu husi nia oan mane mesak ita Na’i Jesus kristu sakrifika nia an ba mate no moris hias atu soi ita husi sala nia ukun lori ita ba hadame malu ho Aman Maromak tamba  ho domin nebé(puro)mós; Tamba ne’e, ha’u nia belun sira, Maromak hadomi ita la’os dehan ida neba Bonita no Bonito, makerek no la makerek maibé Maromak hadomi ema hotu ho fuan Maromak nian duni. Hanesan espresaun baibain ema  dehan katak”mota suli tun ba tasi la hare ba nia foer”; Espresaun ida ne’e fanun ita atu ema hotu hadomi malu ho fuan la’os hadomi ema tuir ita nia gostu nebé ita hakarak maibé tenki hadomi ema ho tasi nebé simu foer.

Domin mak premiu Maromak nian, nebé ita tenki hatutan ba ema seluk, hanesan Bíblia nebé hateten katak “Ema nebé hatene hadomi, ema ne’e maromak nia oan, no nia hatene maromak. Ema nebé la hadomi la hatene Maromak, basa Maromak mak Domin(Jo.4;7-8)”. Tamba ho Maromak nia domin tomak mak halo mundu ne’e, ho lian Latim ida hateten nune’e ”Amor mundum fecit” katak husi domin mak halo mundu.

Domin la’os de’it entre Mane ida ho Feto ida nebé mak hala’o sira nia domin katak sira nain rua namora malu mak ita hanaran domin, maibé domin ne’e mós hanorin ita oinsá atu ajuda malu, respeita malu, hatudu oin hamnasa, fo hanoin malu, asaun karitativa ba malu, fiar malu, lori malu ba dalan loos, kuidadu malu di’ak no hatudu responsabilidade di’ak nudar domin Maromak oan.

Ohin Valentine’s Day ema hotu iha mundu tomak  memoriza ka hanoin hikas fali ita nia Sto.Valentino ou atualmente ita toman ona ho naran Valentine’s Day(O dia do Amor). Domin mak linguagem nebé ema hotu komprende no domin mak forma única nebé ita sente, realmente iha mundu atual, jovem Mane no Feto barak mak hakarak expressa sira nia domin ba malu liu husi sira hahalok sakrifika an, pasiensia, haraik an no sira nia sensus ka sentimentu domin iha sira ida-idak nia fuan laran.

Espesialmente loron sanulu resin haat(14) Fulan Fevereiru hanesan loron ida nebé ita hotu hatene hodi fó memoriza ba Sto. Valentino, nebé saran nia moris tamba hadomi ema hotu ka hatudu domin nebé ho fuan tomak. Hó hahalok domin ida ne’e, jovem sira Feto no Mane hakarak expressa sira nia esperiensia lubuk ida nebé sira ida-idak sente, liu husi Karta ruma no Ai-funan sira fó ba malu ao mesmo tempo mós transmite domin ida ne’e ho maneira seluk tan nudar símbolu ida katak atu hametin liu tan ita nia amizade, no relasaun domin hanesan humanu ida. Ne’e ita bele dehan katak Domin mak presente  ka Dom ida husi Na’i Maromak nian ba ita ema humanu, ida ne’e mak Maromak nia promessa no ita ema nia esperansa.

Hadomi Ho Fuan Nebé Puru

Iha jovem balu mós uza domin hodi hamate fali sira nia an; Domin lolós ne’e, la’os iha tentasaun  ka triste ida maibé domin lolós iha ita ida-idak nia konsiensia rasik no nunka orguilu ho buat saida mak nia halo, domin sempre hakarak hatudu buat ruma nebé mak di’ak liu ka domin nebé puro ka domin serteza. Ita nia hanoin iha parte ida katak domin mós hafalun hotu pekadu ne’ebé ita sura la hotu iha mundu digitalizasaun, domin nia kbi’it la iha limitasaun no nia pasiensia ka sakrifika an la iha rohan.

Domin la halo ita atu sai atan, laloko an, domin lahatene hafahe nia ema, la rai hirus maibé domin presiza komprende malu basá la iha domin, la iha buat ida nebé bele monu ka mosu iha ita ema nia matan nebé hakarak no gosta. Iha parte seluk kada ema ida-idak hakerek rasik nia historia ka iha rasik nia história da vida konaba domin. Istoria konaba domin nebé ita iha daudaun ne’e existe tiha ona iha ita an no hahu forma tuir ita nia existensia nebé mak ita la’o hela iha mundu ne’e; Labarik sira mós iha domin no sira senti domin liu husi ita nia Inan no Aman, kabe na’in sira mós iha domin no sira mós sente rasik domin ne’e ba malu, no ita hotu sente domin nebé mak agora ita la’o hela iha mundu tomak.

Ha’u nia pergunta ida ba ita hotu katak Se ita hotu nebé sente ona domin no la’o hela ho domin ne’e sera que ita fahe domin nebé ita iha ne’e hanesan ba ema hotu eh ita halo limitasaun tiha ba domin ne’e? Ita ida-idak bele reflete rasik ba!! Nudar knanuk Artista Timor oan ida nia dehan: “ibun tutun koalia midar maibé laran ne’e foer hela”. Ida ne’e atu dehan de’it mai ita katak ita koalia mesak furak-furak deit maibé fuan ne’e hatete buat mesak foer de’it.

Ita so merese fahe domin ba malu liu husi ita nia fuan nebé kle’an no la’os to’os domin ba malu liu husi  ibun tutun nebé midar hafalun hela moruk iha laran! Hanesan ita hatene katak sentru ba domin mak ita nia fuan(curacão/jantung). Tamba ita nia fuan ne’e mak Maromak horik ba no Maromak rasik mak domin ne’e. Tamba ne’e, ita hotu presiza kria ita nia fuan ho ambiente nebé mak di’ak atu nune’e Maromak horik iha neba atu ita bele hadomi malu nafatin ho domin lolos.

Konklusaun

Ha’u mai ho liafuan mahusuk ida katak saida mak ha’u presiza atu hatene konaba domin? Haksumik hela nia resposta iha pergunta nebé étika katak saida mak ha’u presiza halo hodi alkansa moris nebé di’ak ; Hó perguntas nebé étika lori ita ba hatan reflesaun ida nebé ejize ita ida-idak matan moris no neon na’in hodi hili dalan nebé lós(verdade).

Ita tenki hakiak ona  karakter nebé krítiku ho ema rasional. Valentine’s Day iha perspetiva filosofia ajuda ita atu kompriende di’ak liu tan konaba esénsia no ezisténsia husi Domin. Husi asaun amorál no erros nebé baibain akontese iha tempu valentine’s Day, ita tenki aprende atu sai ema nebé krítiku no hala’o domin ho razaun nebé ema rasionál.

Ikus liu hakerek na’in husik hela mensagem ida ba jovem feto no mane iha mundu tomak espesial Timor laran tomak katak” hadomi la’os halo ita sai beik, maibé hadomi uza kakutak katak hadomi ho matenek no fuan, hodi nune’e bele lori ita ba deskobre  buat nebé di’ak no hatudu buat nebé furak husi domin ne’e rasik”.

Valentine’s Day sai hanesan oportunidade osan-mean ida atu aprende hadomi ho lolós no lori ita atu sai ema nebé di’ak, labele intepreta arbiru domin nia sentidu hodi sai fali buat nebé la serteza. Tamba ne’e, hadomi malu ho domin nebé serteza ka domin nebé respeita malu ho fuan. Dala ida tan atu termina opiniaun simples ida ne’e hakarak dehan de’it katak “Sem Amor Mundo fica com Triste”.

Hakerek Na’in  : Estudante Gregorio Fidelis Colo Classe: Semestre VII Faculdade: Direito Departamento: Ciência de Direito Escola: Universidade Da Paz