Durante Semana 1 ! Ema 1 Mate & Komunidade 185 Hetan Afetadu
Imajem : Diretor GRFC-APC Cesário da Silva Marques iha salaun APC kaikoli., Segunda (08/07/2024). Foto : Marciana Fernandes
SAPNewsTL, Díli – Centro Nacional Operação Proteção Sivíl (CNOPC, sigla Portugés) Autoridade Protesaun Sivil (APC, sigla Portugés) regista tipu dezastre hamutuk lima nulu resin-sia (59) Durante semana ida (1), entre sira ema ida lakon vida no nain-185 hetan afetadu.
Diretor GRFC Cesário da Silva Marques hateten, iha 1 jullu tinan 2024 durante semana ida iha teritóriu Timor-Leste akontese dezastre naturais ho tipu dezastre hamutuk lima nulu resin-sia (59) ne’ebé registadu, mate ida (1), evakua rua nulu (20), ahi han, anin bo’ot, rai halai, be’e sae no asidente Maritíma.
Diretor GRFC Cesário da Silva Marques salienta, númeru uma kain ne’ebé registadu hamutuk rua nulu resin-ida (21), no total ema ne’ebé afetadu hamutuk-185.
“Númeru uma kain estragus ne’ebé registadu hamutuk rua nulu resin-ida (21), total ema ne’ebé afetadu iha semana ida nia laran hamutuk-185 liu-liu iha munisipiu sira hanesan Atauro, Bobonaro, Baucau, Covalima, Ermera, Díli, Lautém, Manufahi no RAEOA”. Dehan Diretor GRFC-APC Cesário da Silva Marques ba jornalista sira iha salaun APC kaikoli., Segunda (08/07/2024).
Atauro asidente Maritíma ne’ebé akontese vitima hamutuk-16 no ida (1) lakon vida, Bobonaro kauza husi anin bo’ot sobu uma tolu (3), Baucau anin sobu uma haat (4), Covalima anin sobu uma ida (1) no rai halai kauza husi anin udan ne’ebé akontese iha semana ida liu-bá.
Munisipiu Ermera rai halai estraga uma hamutuk sia (9), Munisipiu Díli inséndiu urbanu ida (1), Lautém anin sobu uma ida (1) be’e sae estraga uma hamutuk-11, Manatutu anin sobu uma haat (4) no rai halai sobu uma ida (1) kauza husi udan ne’ebé akontese semana ida nia laran, no Munisipiu Manufahin uma rua (2) no Rejiaun Administrativa Espesial Oe-Cusse Ambeno (RAEOA) anin sobu uma haat (4).
Diretor ne’e mos hateten, relasiona ho dezastre naturais ne’ebé afeta ba komunidade sira, Komandu Operasional Autoridade Protesaun Sivil ho parseiru relevante sira no asistente emerjensia fó ona apoiu ba familia afetadu sira.
“Liu husi Komandu Operasional Autoridade Protesaun Sivil ho parseiru relevante sira, asistente emerjensia fó ona apoiu ba familia afetadu, sira ne’ebé simu ona kategoriza iha emerjensia, ami fó ona apoiu”. Hateten Cesário da Silva Marques.
Enkuantu, klasifikasaun ba dadus habitasaun ne’e APC klasifika ba kategoriza estragus total, kaman no naton molok fó sai ba públiku kada semana.
Jornalista: Marciana da Fernandes