Embaixador Japaun Fasilita Atleta Na’in 6 Hala’o Interkámbiu Iha Sidade Ina
SAPNewsTL, Dili: Nasaun Japaun liu husi Embaixada Japaun iha Timor-Leste apoiu atleta nain-6 Timor-Leste (TL) husi modalidade boxe, taekwondo, natasaun, atletizmu, karate-do no hit besi (powerlifting) hala’o interkambiu iha Sidade Ina, Japaun.
“Objetivu atleta neen husi federasaun boxe, taekwondo, natasaun, atletizmu, karate-do no halterifilizmu ba hala’o interkambiu Japaun ne’e tanba iha 2020 Japaun nu’udar uma nain ba olimpiade maibe tanba COVID-19 muda ba 2021, ita Timor-Leste sidade Ina mak simu ita sai hela fatin ba jogu olimpiku”.
“Entaun iha momentu jogu olimpiade lao iha 2021 tanba COVID-19 ita nia atleta sira labele sai ba liur explora sidade Ina no experimenta buat oi-oin, tan ne’e agora Sidade Ina liu husi embaixada Japaun iha Timor-Leste hakarak konvida atleta sira partisipa Olimpiade ba fali iha Sidade Ina explora sidade Ina hare’e fasilidade desportu, kultura, agrikultura no teknolojia”, dehan sekretariu jeral CONTL Laurentino Guterre ba jornalista sira iha Embaixada Japaun Aitarak Laran, Dili segunda (16/10/2023).
Sekretariu jeral hatutan, atleta husi modalidade neen deit mak ba tanba Sidade Ina mak hakarak konvida tuir lolos atleta sira naton partisipa olimpiade mak ba deit maibe CONTL servisu ho embaixada Japaun iha Timor-Leste lori modalidade neen para atleta sira naton la partisipa olimpiade mos hetan oportunidade ba hare’e Sidade Ina
“Atleta sira atu ba sidade Ina CONTL la halo selesaun ruma fo kompetensia ba federasaun neen hili atleta rasik”. Nia informa
Iha fatin hanesan, embaixador Japaun ba Timor-Leste Kimura Tetsuya sente kontente hasoru atleta sira antes aranka ba Japaun, Sidade Ina mak uma-nain ba Timor-Leste no atleta Timor Oan sira durante eventu boot olimpiade Toquiu iha tinan 2020 la ba parisipa então tinan ne’e sira ba hodi halo Interkambiu
“Ha’u kontenti tebes bele hasoru malu ho imi, antes imi aranka ba Japaun hodi partisipa iha programa interkambiu organiza husi Sidade Ina, Perfeitura Nagano, Japaun, entaun, tinan ida ne’e sidade Ina organiza hikas programa interkambiu ida ne’e hodi konvida atleta Timor Oan sira.” tenik Kimura
Embaixador ne’e hatutan, programa ida ne’e hala’o ho objetivu hametin relasaun amizade entre povu Japaun no Timor-Leste liu husi interkambiu kultura, teknolojia, estilu moris, no seluk tan.
Aleinde ne’e, sei hariku mos kapasidade atleta sira nian laos deit nu’udar atleta deit, nia deseja boaviajen ba atleta sira hotu aproveita didiak ba oportunidade ida ne’e hodi explora kona ba Japaun no halo belun barak iha Japaun.
Nia afirma tan, atleta nain neen husi Timor-Leste ba explora sidade Ina tanba Embaixada Japaun iha Timor-Leste servisu hamutuk ho CONTL no sira lori atleta nain neen husi federasaun neen tanba embaixada hetan autorizasaun husi Sidade Ina haruka atleta Timor-Leste husi modalidade neen.
Enkuantu atleta sira sei hala’o interkambiu loron tolu iha Japaun maibe hamutuk ho sira nia viajen entaun semana ida no atleta sira sei aranka husi Timor-Leste ba Sidade Ina iha loron 17 fulan outubru 2023.
Reportajen: Augusto dos Santos