Emmanuel La Fuan Kiik Kontra Karketu Iha Jornada Daruak

SAPNewsTL, Dili: Emmanuel FC la fuan kiik kontra Karketu Dili FC hodi hadau pontu tolu iha jornada daruak divizaun dahuluk Liga Timorense epoka 2023.

“Ita hotu hatene Karketu Dili FC ekipa zigante, jogador naran boot, treinador nafatin ne’ebe lori klube kampiaun iha tinan kotuk, tatika jogu no  mentalidade jogador ho jogador Emmanuel FC diferente maibe ami nu’udar klube ida partisipa iha liga tinan ne’e ami la fuan kiik kontra Karketu Dili FC, ami sei haree Karketu Dili FC nia pontu fraku hodi utiliza hanesan oportunidade ba ami no ho jogador foinsa’e ami garante hetan pontu tolu kontra Karketu Dili FC iha loron 1 fulan marsu tinan ne’e”, asitente treinador Emmanuel FC Van Basten ba jornalista sira iha Estadium Munisipal Dili segunda 27/02/2023.

Van Basten hatutan, Emmanuel FC hetan derrota iha jornada dahuluk kontra Assalam FC ne’ebe sira halo evaluasaun ba ida ne’e ona, sira preparadu ona prontu hasoru Karketu Dili FC iha jornada daruak divizaun dahuluk Liga Timorense epoka ne’e,  sira nia esparansa iha liga tinan ne’e hakarak sai kampiaun sei la kampiaun labele tun ba divizaun daruak iha Liga Timorense epoka oin mai.

Iha fatin hanesan sekretariu jeral Karketu Dili FC hatete, “Normal iha futebol jogu dahuluk ne’er todan no ami simu derrota la konsege ultrapasa ninia objetivu ne’ebe depois jogu ida ne’er ami nia parte manajementu no tekniku sira halo evaluasaun makaas ona ne’ebe ba jornada daruak kontra Emmanuel FC ami preparadu ona no garante sei hetan vitoria iha loron 1 fulan fevereiru tinan ne’e” tenik Elizeu

Elizeu akresenta tan, jogu dahuluk derrota, jogu daruak tenki manan tanba normalmente iha kompetisaun jogu nian ekipa hotu hakarak manan jogu ne’ebe iha liga tinan ne’e jogu kada ekipa ida joga dala ualu deit ne’ebe sira senti hanesan jogu final hotu kedas bainhira lakon dala rua ona la iha oportunidade ona atu sai kampiaun iha Liga Timorense epoka 2023.

Reportajen: Augusto dos Santos