Ensera Plenária Parlamentu Foinsa’e, Guvernu Sei Garante Sustentabilidade Ba Futuru

SAPNewsTL, Baucau : Durante akompanha enkontru bankada, komisaun no plenaria daikus parlamentu foinsa’e iha Munisipiu Baucau, iha intervista  liu husi Diretor Jeral Sekretaria Estadu Juventude no Desportu (SEJD) David Tomas de Deus haktuir  parlamentu foinsa’e parte ida husi foinsa’e sira, sira mai ho asprirasaun joven sira nian, oinsa bele transmite solusaun ba problema ne’ebe jovens hasoru, Guvernu liu husi SEJD sei garante sustentabilidade Parlamentu Foinsa’e Nian ba futuru, tanba sira hatudu resultadu pozitiva, tinan oin sei halo tan eleisaun foun ba membru Parlamentu Foinsa’e Periodu 2023-2025

“Guvernu liu husi Sekretariu Estadu Juventude no Desportu (SEJD) sei garante sustentabilidade Parlamentu Foinsa’e Nian ba futuru, tanba sira hatudu resultadu pozitiva, tinan oin sei halo tan eleisaun foun ba membru Parlamentu Foinsa’e Periodu 2023-2025l”. Tenik Diretor Jeral SEJD David Tomas de Deus ba Jornalista SAP News iha Salaun Eskola Marista Baucau, 21/12/2022

Sorin seluk, Iha Enseramentu Plenaria Parlamentu Foinsa’e Periodu 2019-2022, Sekretaria Estadu Juventude no Desportu liu husi Diretor Jeral SEJD David Tomas de Deus hato’o agradese ba Média hotu-hotu iha Timor Leste ne’ebe sempre apoia liu husi halo publikasaun notisia sira hotu ba programa SEJD liliu Parlamentu Foinsa’e Nian husi 2019-2022

“Lori  Sekretaria Estadu Juventude no Desportu hato’o agradese ba Media Televizaun Edukasaun Timor, Independente, STL News, SAP News, Timor Post, GMN, Lafaek News no Media hotu ne’ebe apoia programa Parlamentu Foinsa’e liu husi publikasaun sira hotu”. Dehan Diretor Jeral SEJD David Tomas de Deus iha Salaun Santa Ursula Baucau, 22/12/2022

Iha Parte seluk, Diretor Jeral SEJD David Tomas de Deus ne’e kongratula membru parlamentu foinsa’e sira hotu ne’ebe partisipa ativamente iha plenaria refere

“Tempu halo ita hasoru malu iha 2019, tempu halo ita fahe malu iha 2022, mandatu parlamentu foinsa’e mak remata, maibe misaun seidauk remata. guvernu halo buat hotu investe iha ita boot sira, investu ida ne’e iha retornu, retornu mak loron hira parlamentu foinsa’e sira hatudu, parabens ba ita boot sira. rekomendasaun ne’ebe ohin ha’u simu, bazeia ba tematiku lima iha politika nasional juventude, simu ho responsabilidade. maibe politika nasional juventude la’os ba SEJD, ne’e ba ministeriu hotu-hotu, ha’u sei hato’o ba ministeriu relevante ne’ebe identifikadu iha rezolusaun hodi bele fo resposta ba problema ne’ebe joves  sira hasoru iha rai-laran”. Nia dehan

Iha fatin hanesan, Presidente Alumni Parlamentu Foinsa’e Timor Leste (APFTL) Zaulino Gomes da Silva agradese ba vontade no komitmentu tomak hodi halo diskuzaun ne’ebe pertinente los kona-ba problema ne’ebe joven sira hasoru

“Ha’u agradese ba imi nia pasiensia, vontade no komitmentu tomak  hodi partisipa ativa no halo diskuzaun ne’ebe pertinente los, diskuzaun sira hanesan ne’e, ita la hetan iha fatin barak, ita hetan iha fatin balun deit, ita boot sira halo debate, konsege aprova proposta rezolusaun kada komisaun (Joven ho Edukasaun, Saude, Krime no Violensia, Partisipasaun Sivika, Empregu no Empregabilidade) ne’ebe simu husi Diretor Jeral Sekretaria Estadu Juventude no Desportu”. Tenik Zaulino iha Diskursu

Enkuantu, Plenária daikus ne’e Parlamentu foinsa’e produz no aprova ona rezolusaun ida no entrega ona ba Diretor Jeral SEJD David Tomas de Deus, Portantu nia promete sei rekomenda ba ministeriu relevante hodi toma konsideransaun. entertantu Partisipa iha enseramentu plenaria parlamentu foinsa’e mak hanesan representate antigu kombatente, diretor jeral SEJD, CNJTL Munisipiu Baucau, Presidente APFTL, membru Parlamentu Foinsa’e hamutuk 89, inklui konvidadu sira seluk

Jornalista  : Augusto dos Santos