SEJD Agradese Ba Média Sira, Deus Husu Jovens Simu Natál & Tinan Foun Ho Paz
Imajem Intervista Diretor Jeral SEJD David Tomas de Deus iha Baucau, 19/12/2022
SAPNewsTL, Baucau : Durante akompanha enkontru Bankada Parlamentu Foinsa’e Nian iha Munisipiu Baucau, Diretor Jeral Sekretaria Estadu Juventude no Desportu (SEJD) David Tomas de Deus husu joven sira hatudu komportamentu diak iha Ámbitu Natál no Tinan Foun, tinan foun ne’ebe maka nakonu ho paz, hakmatek no domin
“iha Ámbitu Natál no Tinan Foun 2023, ha’u hakarak husu ba fonsa’e sira iha territoriu nasional hodi hatudu komportamentu diak iha selebrasaun Natál no Tinan Foun, oinsa foinsa’e sira bele kontribui ba trankuilu, paz no unidade, labele iha odiu no laran moras ba malu, joven sira tenki kontribui ba estabilidade no desemvolvimentu Nasional”. Tenik Diretor Jeral SEJD David Tomas de Deus ba Jornalista SAP News iha Salaun Eskola Marista Baucau, 19/12/2022
Sorin seluk, Iha Enseramentu Plenaria Parlamentu Foinsa’e Periodu 2019-2022, Sekretaria Estadu Juventude no Desportu liu husi Diretor Jeral SEJD David Tomas de Deus hato’o agradese ba Média hotu-hotu iha Timor Leste ne’ebe sempre apoia liu husi halo publikasaun notisia sira hotu ba programa SEJD liliu Parlamentu Foinsa’e Nian husi 2019-2022
“Lori Sekretaria Estadu Juventude no Desportu hato’o agradese ba Media Televizaun Edukasaun Timor, Independente, STL News, SAP News, Timor Post, GMN, Lafaek News no Media hotu ne’ebe apoia programa Parlamentu Foinsa’e liu husi publikasaun sira hotu”. Dehan Diretor Jeral SEJD David Tomas de Deus iha Salaun Santa Ursula Baucau, 22/12/2022
Enkuantu, Plenária daikus ne’e Parlamentu foinsa’e produz no aprova ona rezolusaun ida no entrega ona ba Diretor Jeral SEJD David Tomas de Deus, Portantu nia promete sei rekomenda ba ministeriu relevante hodi toma konsideransaun. entertantu Partisipa iha enseramentu plenaria parlamentu foinsa’e mak hanesan representate antigu kombatente, diretor jeral SEJD, CNJTL Munisipiu Baucau, Presidente APFTL, membru Parlamentu Foinsa’e hamutuk 89, inklui konvidadu sira seluk
Jornalista : Augusto dos Santos