Estrada Diresaun Luro Ameasa Kotu
SAPNewsTL, Lautém : Estrada diresaun Postu Administrativu Luro, Munisipiu Lautém iha area Suku Afabubo ameasa kotu tanba sofre rai-monu no mota sobu.
Tuir observasaun Jornalista SAPNewsTL iha terenu nota estrada refere sofre fator rua hanesan mota sobu no rai monu tanba rai iha terenu ho forma tahu no laiha moru protesaun.
“Estrada Area Jiliri-Afabubo Munisipiu Lautém aat kleur ona, estrada ne’e sofre rai-monu ka erozaun no mota sobu, estrada refere sempre aat no difikulta movimentasaun transporte sira iha tempu udan”. Jornalista SAPNewsTL haree direita iha terenu, Luro, 30/12/2023.
Antes ne’e, Administrador Postu Administrativu Luro Augusto Ramos Branco haktuir nia parte hato’o ona proposta ba parte relevante liliu Ministériu Obras Públikas (MOP) maibe to’o ohin loron seidauk hetan resposta.
Daudaun ne’e, estrada refere ameasa kotu tanba kada loron sempre akontese udan boot, iha ne’ebe kontribui mos ba mota ho korreta ne’ebe forte hodi sobu rai ne’ebe asegura estrada iha area refere.
Wainhira karreta liu, passajeiru sira sempre tun hodi dada karreta molok atu ultrapasaa estrada refere tanba rai ho forma tahu.
Entretantu, Daudaun ne’e kompanha ida halo ona moru protesaun hodi proteze estrada refere maibe iha semana kotuk udan ikus mai mota sobu, maske nune’e maibe kompanha refere kontinua halo ninia moru protesaun (Gabiaun) hodi proteze estrada refere husi mota no rai-monu.
Hafoin, Notisia ne’e tun, SAPNewsTL seidauk halo komfirmasaun ho Ministériu Obras Públikas, maske nune’e, maibe antes ne’e Institutu Gestaun Ekipamentu Apoiu Dezenvolvimentu (IGEADE) mos halo ona normalizaun mota no estrada maibe ikus mai mota sempre sobu.
Jornalista : Luis Pailofo