Estrada Ligasaun Gleno Ba Letefoho & Atsabe Nakfilak Ba Tahu-Been
SAPNewsTL, Ermera : Estrada ligasaun Postu Administrativu Gleno ba Postu Letefoho no Postu Atsabe nakfilak ba tahu-been, maske nune’e, maibe to’o agora Guvernu seidauk tau iha planu orsamentu tinan 2024.
Tuir observasaun Jornalista SAPNewsTL iha terenu nota estrada diresaun husi Postu Gleno ba Postu Letefoho no Postu Atsabe sai dodok ho tahu no sofre erozaun barak, iha ne’ebe difikulta tebes sirkulasaun transporte husi Gleno ba Postu Letefoho no Atsabe.
“Estrada Ligasaun Postu Letefoho no Atsabe Munisipiu Ermera aat kleur ona, estrada diresaun rua ne’e sofre rai-monu ka erozaun oioin iha fatin barak, estrada refere aat no difikulta movimentasaun transporte sira iha tempu udan tantu tempu bai-loron”. Jornalista SAPNewsTL haree direita iha terenu, Letefoho, 27/12/2023.
Antes ne’e, Vise Ministru Administrasaun Estatal (V-MAE) Jacinto Rigoberto haktuir nia parte sei komunika ho Ministériu Obras Públikas (MOP) hodi halo estrada refere maibe to’o ohin loron seidauk hetan resposta.
Daudaun ne’e, estrada refere iha fatin balun ameasa kotu, no estrada balun nakfilak ba tahu-been kada loron sempre akontese udan boot.
Entretantu, Komunidade sira mos preokupa tanba estrada aat difikulta tebes sira susar atu asesu ba merkadu iha tempu udan.
Hafoin, Notisia ne’e tun, SAPNewsTL seidauk halo komfirmasaun ho Ministériu Obras Públikas kona ba estrada ligasaun Gleno ba Letefoho no Atsabe.Maske nune’e maibe Nonu Guvernu Konstitusional seidauk tau iha planu orsamentu 2024 hodi hadia estrada sira ne’ebe aat liliu estrada diresaun Gleno ba Letefoho no Atsabe.
Jornalista : Ermelinda Soares