F-FDTL, UNTL, DIT No UNITAL Kuda Ai-Parapa, Lutu Aat Fo Livre Ba Animal

SAPNewsTL,Dili: Relasiona ho Selebrasaun Loron FALINTIL ba dala 47, Falintil-Forsa Defeza Timor Leste (F-FDTL) hamutuk ho estudante Universitáriu sira halo reflorestasaun ai-parapa, Tuir Estudante Dili Institute of Technology (DIT), Fortunato Caetano Hornay, sente kontente ho aktividade reflorestasaun ida ne’e, enkuantu nia husu ba governu atu tau matan ba ai-horis sira ne’ebe kuda.

“Nu’udár foinsa’e kontente teb-tebes tanba atividade ohin kuda ai oan kuaze 2500 ital, maske nune’e, maibé ita ladun garantia nia  bele moris ou lae tanba ninia lutu ne’e ladún di’ak, ita bele mai kuda maibé estadu Ministeriu Agrikultura liliu Guarda Florestal mos tenke tau matan ba lutu sira ne’e atu  nune’e bele fo seguransa ba ai-horis ne’ebé ohin kuda ona”. Dehan Fortunatu Caetano Hornay ba Jornalista iha Sukaer-Laran Hera, Kinta-Feira, 11/08/2022.

Estudante ne’e mos husu ba komunidade sira atu responsabiliza, wainhira ta’a ai ida tenke kuda fali atu nune’e ba oin fo matak no mahon nafatin.

“Ita labele bandu sira para labele ta’a ai maibé tanba  sira uza para hodi tein, hodi bele fa’an maibé oinsa sira nia responsabilidade para sira bele ta’a tiha maibé oinsa para sira bele kuda fali, bele ta’a ida, bele kuda fali rua tolu para futuru mai ne’e bele fo moris nafatin ba sira bele fo matak nafatin ba ita nia nasaun ida ne’e”. Tenik nia

Iha fatin hanesan Dosente UNITAL Cornélio Fernando Gusmão sente orgullu wainhira hetan konvite husi F-FDTL hodi selebra loron FALINTIL liu husi aktividade reflorestasaun

“Bainhira ami hetan konvite husi parte  F-FDTL ninian atu hamutuk hodi selebra ka komemora 20 de Agusto nu’udar loron FALINTIL  nian, ami sente orgullu, ami organiza  hodi mai partisipa iha eventu ida ne’e”. Hateten Cornélio

Dosente ne’e hatutan, ai-parapa barak mak kuda maibe hetan estragus husi animal tanba lutu ladún metin

“Akontese dadaun iha real ne’e mak kuaze ai parapa barak ita kuda hetan estragus husi animal sira hanesan karau tanba ita nia lutu ne’ebé ladun metin, ohin ita kuda aban animal bele estraga entaun ne’e ladi’ak, ami rekomenda ba parte estadu atu bele haree didi’ak para labele hetan estragus husi animal sira”. Nia realsa

Dosente UNITAL ne’e mos apela ba komunidade sira presiza tau iha konsiénsia atu labele tesi no estraga ai arbiru tanba ai horis sira ne’e mak fo ar ne’ebé fresku ba ema, Ba oin, komunidade ida ai hun ida, kuda netik iha ida-idak nia uma

Enkuantu, aktividade reflorestasaun ne’e organiza husi F-FDTL iha âmbitu komemorasaun loron FALINTIL ba dala 47 ne’ebé sei akontese iha loron 20 fulan ne’e, purtantu,aktividade ne’e hetan mos partisipasaun husi estudante universitáriu sira hanesan UNTL, UNITAL no DIT hamutuk atus ida liu.

Jornalista   : Marinho de Deus Pinto

Editor         : Luis dos Santos