Fakuldade Engenharia Ne’ebe Dizitalizadu & Modernizadu Iha UNTL
SAPNewsTL, Dili : Fakuldade Engenharia Siénsia no Teknolojia, Universodade Nasionál Timor Leste (FEST-UNTL) hanesan fakuldade ne’ebe dizitalizadu no modernizadu iha UNTL tanba sistema hotu ho online no infraestrutura ne’ebe adekuadu tuir padraun internasionál.
Hafoin halo rejistu online liu husi sistema SIA, Estudante Finalista Departamentu Enjenharia Sivil heldemer Lopes hateten, nia parte konsidera fakuldade engenahria ne’e uniku no diferente tanba hahu dizitaliza no moderniza ona iha sistema online no uza infraestrutura ne’ebe tuir padraun internasional.
“Ha’u sente kontente tebes tanba to’o ohin loron fakuldade engenharia tama ona iha sistema dijitalizasaun ne’ebe diak no uza infraestrutura ne’ebe adekuadu no avansadu liu iha UNTL, liliu ita mos expanda ona ba fakuldade sira seluk iha UNTL hanesan Agrikultura, Ezatas, Direitu no seluk tan”. Tenik Estudante Finalista Departamentu Enjenharia Sivil heldemer Lopes iha Kampus FEST-UNTL Hera, 16/02/2024
Antes ne’e, Dekanu Fakuldade Engenharia Siénsia no Teknolojia (FEST-UNTL), Adalfredo da Silva Ximenes haktuir, Fakuldade Engenharia ohin loron bele hetan fatin ne’ebe diak ho infraestrutura adekuadu tanba hetan apoia husi Jepan International Cooperation Ajency (JICA) iha tinan hirak ba kotuk.
Adalfredo informa tinan ne’e fakuldade ne’e sei loke tan kursu mestradu ba engenharia hodi forma no prepara rekursu humanu kualidade ba Timor Leste
“Tinan ne’e Fakuldade Engenharia Siénsia no Teknolojia UNTL, ita sei loke kursu mestradu ba area engenharia, dosente sira sei mai husi Japaun no doutor sira balun ne’ebe iha ne’e mos sei hanorin”. Tenik Dekanu FEST-UNTL Adalfredo da Silva Ximenes liu husi nia diskursu iha Auditorium Hera, 31/01/2024
Dekanu Fakuldade ne’e hateten susesu ne’e mai husi prosesu naruk ida hanesan ai oan ida ne’ebe ema kuda, hafoin nia rega bee, kuidadu no proteze nia didiak molok nia sai boot no fo fuan.
“Susesu ne’e lori prosesu naruk ida, hanesan ita kuda ai oan ida, ita presiza rega, kuidadu, proteze no haree didiak, hafoin nia bele moris buras no diak, tanba ne’e husu ita hotu atu servisu makaas hodi dezenvolve ita nia fakuldade ne’e ba oin”. Adalfredo hateten
Senadu Fakuldade Engenharia Sergio Alves da Costa husu ba estudante hotu iha UNTL, hodi banidas estuda, lee barak, hakaas an hodi luta ba realiza ida-idak ninia mehi ne’ebe seidauk atinji, labele sai estudante ne’ebe baruk ten no la hatene esforsu, tanba joven ne’e nu’udar esperansa, fini no futuru ba familia, sosiedade no nasaun.
“Husu estudante hotu iha UNTL, ita ne’e futuru, fini no esperansa ba nasaun ida ne’e, ita tenki halakon ita nia barukten sira, ita tenki hakaas an hodi prosesa estudu ne’e ho lais no susesa tuir tempu ne’ebe determina”. Sergio sublinha
“Ita estudante fakuldade engenharia eskola iha edifisiu ne’ebe avansadu (mewa) ho laboratorium kompletu, sala de aula, biblioteka, sala estuda, entaun ita nia kunhesimentu no kapasidade mos tenki avansadu tuir saida mak ita uza no haree, laiha razaun atu ita la esforsu no susesu tanba se uluk ita nia funu nain sira no aman inan sira eskola iha fatin ne’ebe ladun sufisiente bele susesu liliu lori ita nia nasaun sai husi invazaun no livre husi injustisa no hetan ukun rasik an, tan nusa nita labele, sa mak ita sei falta, ita tenki promete ta ita nia an katak ita tenki susesu iha loron ida”. Sergio da Costa hateten
Enkuantu, Universidade Nasionál Timor Lorosa’e (UNTL) eziste fakuldade sanulu (10), entre sira Fakuldade Engenharia Siénsia no Teknolojia (FEST) iha departamentu hamutuk lima mak hanesan Engenharia Sivil, Mekánika, Informátika, Eletronika no Elétrika, Geologia no Petróleu.
Fakuldade Engenharia antes ne’e hetan apoia husi JICA, iha ne’ebe konstrui edifisiu ho kualidade internasional ne’ebe kompleta ho biblioteka, laboratóriu, sala de aulas, sala professores, sala de estudu, sala de reuniaun, auditorium inklui ho nia sistema ne’ebe dizitalizadu no modernizadu.
Jornalista : Ermelinda Soares