FEKATIL Lori Atleta Nain-5 Sei Kompete WKF Iha Jakarta

DILI-Federasaun Karate-Do Timor-Leste (FEKATIL)  Lori Atleta nain lima,  feto 2 mane tolu sei ba kompete iha World Karate Federation (WKF) Seria A  iha Jakarta, Indonesia hodi hadia pozisaun federasaun iha pozisaun organizasaun Internasional Karate nian.

“Ita nia atleta nain lima ne’ebe mak atu kompete iha World Karate Federation iha Jakarta, Indonesia ne’e selesionadu husi FEKATIL mak hanesan, atleta Lucelia Solinha Fernandes sei kompete iha 68 Kg,  Romana do Carmo dos Santos kompete iha Jurus,  Lucas da Silva Ailerbito Quefi kompete iha 55 Kg,  Deonisio Fernandes Pereira Quefi kompete iha 67 Kg no atelta Jacob Manuel kompete iha 75 Kg hamutuk ne’ebe ami sei ba ho delegasaun ema hamutuk nain sanulu kompostu atleta, ofisial no treinador sira”, Prezidente FEKATIL Filomeno S. de Araujo ba jornalista sira iha edifisiu CDTL Caicoli, Dili kinta (10/11).

Prezidente hatutan, WKF Ida ne’e programa organizasaun internasional Karate-Do nian ne’ebe Timor-Leste tenki partisipa para hadia pozisaun nasaun Timor-Leste iha organizasaun mundial tanba para hafasil federasaun lori atleta Timoroan ba partisipa eventu internasional sira organiza husi organizasaun Karate  internasional no atleta sira nia partisipasaun ne’e hetan apoiu husi Sotokhan Karate-Do Timor-Leste, Kusin-ryu Karate-Do Timor-Leste no Goju-ryu Karate-Do Timor-Leste  ne’ebe hamahan iha FEKATIL ne’ebe atleta sira sei aranka iha loron 15 fulan Novembru 2022 no kompetisaun ne’e realiza  iha loron 18-20 fulan Novembru 2022.

Nia kontinua tan, esperansa federasaun ba atleta sira mak tenki hetan buat ruma maibe depende ba sira nia jogu tanba sira sei kompete ho atleta atus ida resin

 “Esperansa FEKATIL ba atleta sira mak ita nia atleta sira  tenki hetan buat ruma maibe depende ba atleta sira hatudu jogu tanba jogu iha lakon no manan, kompetisaun ne’e mos sei kompete husi nasaun atus ida resin ne’ebe hein atleta sira rezultadu ne’ebe mai ho rezultadu diak ba kompete ho nasaun atus ida resin ne’e atleta sira mak ami sei prepara nafatin ba kompetisaun internasional sira iha futuru hanesan Sea Games 2023”, tenik Filmeno

Iha fatin hanesan Atleta Deonisio Fernandes Pereira Quefi hatete, preparasaun ba kompetisaun WKF ne’e sira sente preparasaun minimu tebes ba kompetisaun internasional karate nian tanba sira difikuldade ba durasaun treinamentu, fasilidade, hahan no fatin treinu maibe sira agradese ba FEKATIL buka dalan suporta sira ba partisipa kompetisaun ne’e no esperansa ba kompetisaun iha prosesu nia laran.

“Preparasaun ba kompetisaun WKF ne’e ami sente preparasaun minimu tebes ba kompetisaun internasional karate nian ne’e tanba ami iha difikuldade ba durasaun treinamentu, fasilidade, hahan no fatin treinu maibe ami agradese ba FEKATIL buka dalan suporta ami hodi ba partisipa kompetisaun ne’e no esperansa ami nian  ba kompetisaun iha prosesu nia laran”, tenik Deonisio

Jornalista  : Augusto dos Santos