Fiar Sei Liu Barreira, PST Husu Povu Vota Ba Projetu Polítiku La’os Fígura & Istória

Imajen : Avelino Coelho

SAPNewsTL, Dili : Presidente Partidu Sosialista de Timor (PST) Avelino Coelho liu husi Programa Talk Show iha kinta-feira foin lailais ne’e, husu ba Simpatizantes sira, Militantes, Kuadru sira hodi evita no labele trata, insulta no tolok ema seluk iha social media no kampanha eleitoral

“Ha’u husu ba Militante Partidu Polítiku sira labele trata no tolok ema seluk iha kampanha, tanba demokrasia lalos fo espasu ba ema hodi insulta malu, konta história, hatun malu, maibe buka atu eduka povu ho esklaresidu, sensibilizadu hodi vota ba projetu polítiku no programa partidu”. Tenik Presidente PST Avelino Coelho iha Sede Nasionál PST, Balide Dili, 30/03/2023

Presidente PST ne’e argumenta, tempu ona para povu tenki esklaresidu no vota ba projetu polítiku la’os vota ba figura, história no organizasaun tanba PST defende katak estadu laiha rai, rai povu nian, PST defende povu kiak no ema sira ne’ebe moris iha dalan ninin

Nia hatutan, governasaun sira antes ne’e falla tanba setor agrikultura mate tanba natar sira no toos iha fatin barak abandonadu, la fo sala ba ema ida, maibe sistema mak sala, tempu ona para hadia sistema hirak ne’e

“Setor Agrikultura toba no mate, tanba natar no toos barak abandonadu, la fo sala ema maibe konsidera sistema mak sala, ita tenki hadia sistema katak subsidia agrikultor sira, asaun ba traballador sira, moderniza no induztrializa setor agrikultura hodi  kore povu husi kiak no mukit, kria empregu ba Timor oan sira hodi hamenuz importasaun sira hanesan foos, ikan, mina, no aihan sira seluk tan”. Nia defende

Lider Jerasaun foun ne’e mos fundamenta,  povu partisipa eleisaun dala lima ona, povu ne’e iha ona experiensia hodi hili partidu sira ne’ebe bele lori revolusaun no mudansa ba povu nia moris

“Eleisaun dala lima ona, eleitoradu sira iha ona experiénsia hodi hili partidu sira, Kuantu mais eleitoradu barak jovens, ho jovens ne’ebe barak, PST garante sei liu barreira no aumenta tan kadeira, nu’udar Presidente Partidu fiar katak objetivu sei to’o, tanba ami iha konfiansa ba jovens sira liliu iha Ermera, Likisa, Manatutu, Vikeke, Lautem no Munisipiu sira seluk tan”. Nia akresenta

Entretantu, PST mos defende Projetu Greater Sunrise dada mai Timor Leste, tanba desde 2002 PST defende ona, iha ne’ebe seidauk iha Partidu Polítiku ida mak kontra wainhira PST defende Greater Sunrise tanba Partidu ne’e konsiente katak Greater Sunrise sei lori empregu no moris diak ba povu

Lider PST ne’e husu ba povu Timor Leste hodi hanoin didiak, deside iha minutu ida hili partidu ne’ebe bele lori mudansa no hadia rai ida ne’e, Enkuantu Lider ne’e mos husu ba Estrutura Brigade Revolusionáriu sira iha teritóriu nasionál hosi kontinua sensibiliza no konsensializa povu agrikultor sira, inan aman sira no joven sira hodi determina nasaun nia futuru iha eleisaun loron 21 Maiu 2023

Jornalista : Conzita Mota