FVTL Realiza Divizaun Dahuluk Liga Voleibol 2023
SAPNewsTL, Dili: Federasaun Voleibol Timor-Leste (FVTL) realiza divizaun dahuluk Liga Voleibol Timor-Leste epoka dahaat partisipa husi klube feto neen no mane hitu hamutuk klube sanulu resin tolu (13).
“Ita kleur ona la liga ba divizaun dahuluk razaun tanba ita hasoru dezafiu barak iha situasaun real ida ne’e ita hetan pandemia, ho Timor-Leste realiza festa demokrasia eleisaun parlamentar nune’e ita la realiza liga voleibol divizaun dahuluk liu tiha situasaun sira, ami foin hato’o fali ami nia programa ba MJDAK depois MJDAK aprova. tan ne’e ohin loron ami halo abertura ba divizaun dahuluk Liga Voleibol epoka dahaat 2023”, dehan Prezidente Komisaun Organizadór Candido da Silva Pinto ba jornalista sira iha jinajiu desportu Dili Caicoli, Dili tersa (24/10/2023).
Prezidente hatutan, Liga ida ne’e rasik sei fo benefisiu ba povu Timor-Leste laran tomak liuliu jogador sira tanba voleibol ne’e to’o ona iha area rural tanba sira fo ona formasaun ba treinador ho arbitrajen iha munisipiu 12 ho RAEOA.
Divizaun datoluk hala’o iha munisipiu sira, kampiaun iha munisipiu mai kompete divizaun daruak iha nasional depois kampiaun iha divizaun daruak klube sira promovidu ba divizaun dahuluk Liga Voleibol Timor-Leste ho objetivu hetan jogador kualidade ba selesaun nasional Timor-Leste ba jogu internasional sira.
Candido informa tan, ohin sira hala’o abertura ba divizaun dahuluk Liga Voleibol Timor-Leste epoka dahaat 2023 hein katak povu Timor-Leste bele asiste no liga ne’e hala’o tanba hetan fundu husi MJDAK ho orsamentu montante 72, 419 USD ho patrosinador husi Timor Telecom apoiu 750 USD.
Prémiu Liga Voleibol Timor-Leste epoka dahaat 2023 ba kampiaun feto mane simu 8,000 USD, manan nain daruak feto mane hetan 6,000 USD, manan nain datoluk simu 4,000 USD no manan nain dahaat feto mane hetan 2,000 USD Nia afirma tan, tuir lolos klube sira kompete iha liga agora ne’e mane hamutuk 8 maibe iha klube balun rezigna razaun tanba klube hetan problema iha jogador nune’e ekipa hamutuk 13 mak kompete divizaun dahuluk Liga Voleibol Timor-Leste epoka dahaat 2023.
Enkuantu, ekipa feto hamutuk neen, Ad-SLB, Fitun Lorosa’e, ADR-União, Choque, Joli Toni no Assalam no ekipa mane hanesan, K-link, Choque, Ambeno, Uset, Espada, AD-SLB no Bandidu Qualidade, jogu époka tinan ne’e utiliza kampu voleiból Jináziu Desportu Dili (GDD-sigla Portugés). Tipu jogu ne’e full competisaun, entaun klube sira joga hotu foin tama semi final mak determina klube ne’ebé mak sai kampiaun ba époka tinan ne’e.
Entretantu, iha jogu abertura divizaun dahuluk Liga Voleibol Timor-Leste epoka dahaat 2023 ekipa AD SLB Manan Fitun Loronsae ho skore 3-0 husi set tolu 25-17, 25-06, ho 25-14 no Husi ekipa mane Choque manan K-LINK ho skore 3-0 husi set tolu 25-19, 25-19 ho 25-17.
Reportajen: Augusto dos Santos