Guvernu Aprova Dekretu Lei, Subsidia Kompaña Importador Foos Ho Presu $5 Kada Saku

SAPNewsTL,DILI– Sorumutu Konsellu Ministru, governu aprova projetu Dekretu-Lei kona ba medida intervensaun temporária ba estabilizasaun presu foos iha merkadu, liu hosi atribuisaun subsídiu pekuniáriu ba empreza importadora sira.

Tuir Períodu vijénsia husi medida ba diploma refere sei hein loron 180, hafoin diploma ne’e tama iha vigór, iha loron tuirmai husi ninia publikasaun, ba determina mós konstituisaun stock suplementár ida ba seguransa foos, ho tonelada rihun 30, hodi rai iha armazein Sentru Lojístiku Nasionál (SLN), ne’ebé destina ba intervensaun sosiál iha situasaun emerjénsia.

“Benefisiárius husi medida ida-ne’e, empreza sira ne’ebé fa’an ho kuantidade boot ka operadór ekonómiku sira ne’ebé komprova, liuhusi kópia autentikada husi Autoridade Aduaneira, katak sira importa no simu ona kuantidade foos ho karaterístika ne’ebé define ona iha diploma ne’e, simu valór hamutuk dolar amerikanu 5 kada foos ho 25kg ne’ebé importa ka fa’an”.

Governu konsidera katak Implementasaun husi media ida-ne’e, ninia objetivu mak atu satisfás nesesidade alimentár populasaun sira nian ho folin ida ne’ebé asesivel liu, hodi kompensa empreza importadora sira husi folin importasaun nian no kria stock minimum hamutuk foos tonelada rihun 30 ba situasaun emerjénsia.

Presu foos importadu, ne’ebé fa’an iha armazeins empreza importadora sira nian no fa’an filafali ba konsumidór sira iha loja sira ne’ebé fa’an foos ho kuantidade uitoan-uitoan ne’ebé ema barak liu maka konsume, estabiliza ho valór 50 sentavus kada kg.

Jornalista : Marcela Mery da Costa