Hadia Arbitrájem & Dezenvolvimentu Futebol ! Nivio Eleitu Ba Prezidente AFF-TL 2024-2028
SAPNewsTL, Dili: Nivio da Costa Fernandes eleitu sai prezidente foun Asosiasaun Arbitrajen Futebol Timor-Leste (AAF-TL) hafoin hetan konfiansa husi kongresista 18 husi koordenador arbitrajen munisipiu 14, instruktor futsal ho futebol, arbitrajen futsal no arbitrajen FIFA iha kongresu daruak periodu 2024-2028.
“Hau hato’o agradese wa’in ba koordenador arbitrajen munisipiu hotu ho nasional sira fo votu hau nu’udar prezidente foun AFF-TL ba periodu 2024-2028 hodi lori arbitrajen ne’e ba oin tanba arbitrajen ami hotu nian laos Nivio nian mesak tan ne’e hau sei simu kritika atu hadia bainhira hau halo sala, ita presiza kuida nia imajen tanba ema sosa labele”, dehan prezidente eleitu Nivio da Costa Fernandes ba jornalista sira iha salaun Xanana Sport Center Bairo Formosa, Dili sabadu (20/01/2024).
Prezidente eleitu hatutan, programa estrutura eleitu ba oin sei halo mak halo formasaun ba arbitrajen sira ida ne’e mos hanesan programa prinsipal FFTL direitamente mai husi FIFA, AFC no AFF, halo akompañamentu ba arbitrajen sira iha munisipiu sira para halo selesaun ba arbitrajen sira performa diak lori mai iha nasional hodi prepara ba arbitrajen FIFA.
Daudaun ne’e Timor-Leste iha arbitrajen FIFA nain tolu maibe sira tenta para hetan arbitrajen FIFA foun liu husi akompañamentu ba arbitrajen sira iha munisipiu sira nian, programa ida tan mak ba arbitrajen idade 45 ba leten ne’e sira sei halo selesaun hodi promove sira sai asesor ba jogu, instruktor no match commissioner tanba sira tenki mai hudi background arbitrajen hatene lei jogu nian.
Nivio informa tan, programa sira ne’e bazeia ba finanseiru tan ne’e sira sei halo planu orsamentu ba FFTL tau iha programa orsamentu anual depois lori ba FIFA atu nune’e iha orsamentu realiza programa sira ne’e, tanba programa estrutura foun AAF-TL periodu 2024-2028 sei hahu iha fulan fevereiru.
Iha fatin hanesan, koordenador arbitrajen munisipiu Manufahe Santiago Da Conceicão hatete, kongresu ida ne’e sira atu hili estrutura foun atu nune’e bele hadia diak liu tan problema barak durante AAF-TL infrenta.
“Iha kongresu ida ne’e hili estrutura foun AAF-TL periodu 2024-2028 para atu hadia arbitrajen inklui dezenvolvimentu futebol iha Timor-Leste nune’e hau fo nia esperansa tomak ba prezidente eleitu atu bele hadia diak liu tan problema barak durante AAF-TL infrenta”, tenik Santiago
Santiago salienta tan, foin lalais iha loron 10 fulan janeiru 2024 kongresu FFTL faila, fator ida sai polemiku iha kongresu inklui AAF-TL hotu tan ne’e husi problema mak prezidente interinu FFTL nomeia AFF-TL halo kongresu para hadia problema iha AAF-TL nia laran tan ne’e ohin sira halo kongrese AAF-TL ba daruak ida ne’e.
Portantu kongresu daruak AAF-TL periodu 2024-2028 ne’e estrutura foun eleitu ho aklamasaun la iha eleisaun tanba pakote uniku,Estrutura foun eleitu iha kongresu AAF-TL periodu 2024-2028 mak Nivio da Costa Fernandes nu’udar prezidente, Jaime do Rego Gonçalves nu’udar vice-presidente, Vital Saldanha nu’udar sekretáriu jeral, Lorenço Guterres nu’udar adjuntu sekretariu jeral, Cancio Gusmão nu’udar tezoreiru.
Orgaun Fiskal AAF-TL periodu 2024-2028 mak Pedro M. Carvalho nu’udar prezidente, Silvano J. Vieira nu’udar vice-presidente, Candido Maia nu’udar sekretáriu, Vogal dahuluk Nazario do Carmo no Vogal daruak Antonio Carvalho.
Entretantu kongresu AAF-TL ne’e rasik hala’o iha Xanana Sport Center partisipa husi kongresista 18 husi koordenasaun arbitrajen munispiu 14 mak Lautem, Baucau, Manatuto,Viqueque, Dili Leste, Dili Oeste, Aileu, Ainaro, Manufahe, Covalima, Liquisa, Bobonaro no Oe-cusse, koordenador arbitrajen futsal, instruktor futebol ho Futsal, arbitrajen FIFA sekretariu jéral FFTL Gregorio Correia, reprezentante ezekutivu FFTL no observa husi reprezentante STFJTL no komisaun legal FFTL.
Reportajen: Augusto dos Santos