Hadia Kualidade Atendimentu Públiku, CDTL Transmite Formasaun Ba Organizasaun Desportiva Sira
SAPNewsTL, Dili: Konfederasaun Desportu Timor-Leste (sigla portuges CDTL) realiza formasaun kona ba atendimentu públiku, importansia psikolojia, planeamentu ho monitorizasaun, protokolu no manajementu organizasaun ba organizasaun desportiva iha Timor-Leste durante loron rua nia laran.
“Ita nia objetivu ba workshop loron ohin nian ho tema dezenvolvimentu ba organizasaun desportiva sira ne’e ita halo formasaun kona ba atendimentu publiku, importansia psikolojia, planeamentu ho monitorizasaun, protokolu no manajementu organizasaun ba organizasaun desportiva iha Timor-Leste”,
“Pontu lima ne’e importante mak CDTL hala’o para bele halo dezenvolvimentu ba organizasaun desportiva iha Timor-Leste”, dehan vise prezidente CDTL Inocencio de Araujo ba jornalista sira iha salaun otel luz Clarita Formosa, Dili tersa (26/09/2023).
Vise Presidente hatutan, pontu lima importante ba federasaun tanba federasaun desportiva sira halo atendimentu ba atleta, administrasaun no rekursu sira seluk, bainhira federasaun sira servisu iha presaun psikolojia servisu sei lao la diak
Federasaun sira tenki iha planu diak no halo monitorizasaun avalia nia rezultadu, sistema protokolu iha federasaun ne’e importante tanba hatene situasaun balun atu ba liur ka halo preparasaun ruma nia protokolu oinsa ne’e tenki prepara ikus liu mak kada federasaun sira tenki halo jestaun diak.
Inocencio informa, depois remata workshop ne’e CDTL sei kontinua nafatin halo avaliasaun ba membru organizasaun desportiva sira, ohin loron tuir workshop ne’e atu hare’e federasaun sira halo duni iha idak-idak federasaun ka lae
Karik federasaun la halo CDTL sei halo planu nafatin para dezenvolve organizasaun desportiva sira iha Timor-Leste diak liu tan no workshop ne’e CDTL hala’o durante loron rua komesa husi loron 26 to’o 27 fulan setembru 2023.
Iha sorin seluk, formador José de Araujo Chan hatete, Kada organizasaun halo atendimentu públiku, tan ne’e CDTL senti materia atendimentu públiku ne’e importante tebes atu fo ba reprezentante organizasaun desportiva sira iha Timor-Leste para hadia sira nia kualidade atendimentu
Sira orgullu CDTL hare’e ona katak afinal atendimentu públiku importante atu fo membru organizasaun desportiva sira para hadia sira nia atendimentu públiku.
“Kada organizasaun halo atendimentu públiku tan ne’e CDTL senti materia atendimentu públiku ne’e importante tebes atu fo ba reprezentante organizasaun desportiva sira iha Timor-Leste para hadia sira nia kualidade atendimentu tanba ita hare’e iha Timor-Leste ita iha problema ba atendimentu públiku.”
“Tantu iha setor privadu no governu seidauk iha nia atendimentu diak ho kualidade nune’e ami sente orgullu tanba CDTL hare’e ona katak afinal atendimentu públiku importante atu fo membru organizasaun desportiva sira para hadia sira nia atendimentu públiku”, tenik Jose
Jose afirma tan, hadia atendimentu públiku importante mak sistema atendimentu públiku tenki diak tanba agora Timor-Leste seidauk iha prosedimentu klaru ba kliente sira halai ba mai los
Fasilidade sira presiza hare’e, rekursu umanu tenki dixiplina ho atitude diak, iha Timor-Leste presiza hadia atitude rekursu umanu sira no ikus liu governu tenki iha ona komprimisiu hadia atendimentu públiku para lori povu ne’e sai husi kiak no mukit.
Entretantu, formador fo formasaun ba reprezentante organizasaun desportiva sira iha Timor-Leste mak José de Araujo Chan ho Teotonio Pinto husi INAP, Jose Lopes Ho Maria do Ceu dosente UNTL.
Representante husi organizasaun desportiva sira hamutuk 19 hanesan federasaun kriket, voleibol, atletizmu, wushu, basketebol, aikido, silat, siklizmu, shorinji kempo, badminton, tenis Kampu, xadres, hockey, andebol, taekwondo boxing, karate-do, motosiklizmu no FHAKUPTIL maibe federasaun sira hamahan an iha CDTL ne’e hamutuk 35 entaun reprezentante husi federasaun 16 mak la tuir formasaun ne’e.
Reportajen: Augusto dos Santos