Abilio: Problema Boxista Iha Asian Games, FBATL Tenki Toma Responsabilidade

SAPNewsTL, Dili: Reprezentante EL Matador Boxing Club no treinador Abilio Orlando dos Santos hatete, Federasaun Boxe Amadora Timor-Leste (FBATL) tenki toma responsabilidade ba problema boxista nain haat labele kompete Asian Games 2023 iha Hangzhou, China.

” Ita nia boxista nain haat la kompete Asian Games tanba la hatama rekezitu ne’e treinador selesaun no ofisial lori boxista ba China mak toma responsabilidade tanba saida agora boxista sira la priense rekezitu atu tuir kompetisaun Asian Games no durante fulan hira ne’e treinador sira hamutuk ho federasaun la prepara rekezitu sira ne’e,”

“Tan ne’e nu’udar problema boot mak FBATL halo ba boxista sira no FBATL atu lori boxista sira nia futuru ba ne’ebe, la ba oin maibe ba kotuk fali,rekezitu hanesan relatoriu mediku no anti dopazen ne’e tekniku sira iha federasaun boxing hamutuk ho treinador sira mak hatene ida ne’e maibe hare’e ba problema agora boxista nain 4 hasoru iha China ne’e hatudu katak treinador selesaun nasional la kapasidade para lori atleta sira ba kompete Asian Games”.

Reprezentante EL Matador Boxing Club no treinador Abilio Orlando dos Santos saran lia hirak ne’e ba jornalista sira iha Sport Benfica Dili segunda (25/09/2023).

Treinador ne’e hatutan, FBATL lori boxista nain haat husi Timor-Leste ba kompete iha Asian Games iha sidade Hangzhou, China maibe to’o tiha China atleta nain haat ne’e labele kompete tanba failansu FBATL la hatama relatoriu saúde (medical records), ho anti dopazen tan ne’e nia nu’udar reprezentante EL Matador Boxing Club no treinador ba boxista Delio A. Mouzinho sente triste los tanba nia atleta lakon oportunidade boot

Ekipa Husi FBATL ba Asian Games 2023 iha Hangzhou, China kompostu husi boxista nain haat, Delio A. Mouzinho, Alexandre M. Freitas, Edegar Foe Quintas ho Elisio R. Gaio, prezidente FBATL Januario da Silva Brito, sekretariu jeral FBATL Rogerio Amaral no treinador Sebastião da Silva

Nia mos hetan informasaun husi media balun katak FBATL mak la hatama rekezitu ba CONTL maibe tuir lolos ba ekipa kaer atleta sira mak toma responsabilidade ba rekezitu sira nJe’e, depois boxita sira fila mai Timor-Leste, klube sira hamutuk ho federasaun sei halo avaliasaun ba problema ida ne’e para ba oin bele hadia.

Entretantu, ba lamentasaun no preokupasaun boxista Timor-Leste nian ne’e, Xefe Misaun Timor-Leste bá Asian Games Xina 2023, Mateus da Cruz, esklarese liu media Hatutan.com katak boxista nain haat labele joga iha kompetisaun Asian Games tanba la prienxe rekizitu husi International Boxing Association (IBA) ho World Boxing.

Boxista la joga ne’e la’ós tanba CONTL mak sala, maibé tanba sira laiha relatóriu administrasaun bá Federasaun Boxing Internasional, FBATL laiha record ida para hato’o ba Federasaun Boxing internasionál no uluk Timor-Leste sempre hetan toleránsia, no CONTL rasik sempre fo hatene antes ba kada Federasaun, maibe sira ladun tau atensaun.

Mateus afirma tan, sira-nia problema ne’e tanba laiha record mediku nian no laiha tan kona-ba anti dopazen nian, no iha mos problema sira kona-ba dokumentu administrativu balun FBATL tenke kompleta mais dokumentu sira ne’e tahan ida deit mos iha federasaun internasionál laiha.

“FBATL mak tenke responsabiliza no CONTL nia responsabilidade mak rejista sira ba sistema para mai joga agora kona-ba uma laran ne’e sira tenke rezolve ho federasaun internasionál la’ós CONTL no bainhira federasaun internasionál ho IFC mai husu sira nia dokumentu tahan ida mós laiha”.nia subliña

Nia esklarese tan katak boxista Timoroan sira la joga laos tanba tarde, maibe sira mak la prienxe rekizitu sira federasaun internasionál iha no CONTL iha ne’e para atu rejista sira no sira mai atu joga de’it laos atu tuir tan teknical meeting.

Portantu, FBATL fo informasaun ba publiku liu husi pajina ofisial facebook federasaun nian katak boxista nain haat la kompete Asian Games 2023 iha China tanba la tuir technical meeting no dada sorteiu kauza husi sira halo viajen tarde.