Hakbit Jovens, MJDAK Ho Parseiru Sira Selebra Loron Internasionál Juventude
SAPNewsTL, DILI- Festeza Loron Internasionál ba Juventude, UNFPA hamutuk ho Conselhu Nasional Juventude Timor-Leste(Sigla husi lian Portugues CNJTL),no Juventude sira seluk husi sentru formasaun sira, hala’o marxa saudavel ho nia tema “Hakbit Joven sira ho abilidade verde ba dezenvolvimentu iha mundu ne’ebe sustentavel”
Diretor Jerál Ministériu Juventude Desportu Arte e Cultural, David Tomas de Deus hateten aktividade ba selebrasaun loron internasional Juventude ne’e hala’o iha Dili inklui Suai ho aktividade sira ne’ebe mak hanesan
“Tinan ida ne’e ita servisu hamutuk ho parseiru sira henesan UNFPA, Ita organiza hodi komemora ba loron mundial ida ne’e. Ita halo iha Dili no Suai ho nia tema abilidade juventude iha Verde iha Dezenvolvimentu sustentavel ba mundu, bazeia ba tema ida ne’e ita hamutuk elabora ho aktividade lubuk ida iha ambitu ida ne’e”. Dehan Diretor Jerál, David Tomas de Deus ba Jornalista sira, iha kampu futebool Lecidere,Quinta-feira(10/08/2023)
Nia saleinta katak aktividade sira ne’ebe mak realiza hodi festeza loron mundial Juventude mak, seminariu iha suai, marxa saudavel, konsertu musika, doasaun ran, diskursu publiku ba joven sira. Ho aktividade hirak ne’e bele hasa’e konhesimentu, abilidade ne’ebe mak diak para bele kontribui ba dezenvolvimentu sustentavel
Iha fatin hanesan, Representante United Nations Population Fund( sigla iha lian English UNFPA), Pressia Arifin haktuir katak UNFPA servisu hamutuk ho governu ho parseiru hotu hodi apoiu Juventude sira iha area negosiu hodi kapasita Juventude sira
“UNPFA hanesan agência ONU ida ne’ebe mak servisu hanesan Juventude nian, ami sente importante laos empodera joven sira deit maibe entermus husi area sira hanesan negosiu nian oinsa iha abilidade no mos iha area sira seluk mos importante atu investe iha area sira hanesan abilidade verde nian, Nune’e joven sira bele iha kapasidade” Nia dehan
Nia informa katak Timor-leste maioria joven barak, ho nune’e inisiativa festeza loron Internasional ne’e hodi fo hanoin ba Governu no parseiru sira hodi bele halo investimentu ba Juventude sira
“Dadus ne’ebe mak ita iha, Juventude ne’e iha 289.992 ou 21% husi populasaun joven husi idade 15-24, ne’e hatudu katak maioria populasaun Timor ne’e joven, depois husi numeru ida ne’e 36.377 sira la hatene lee no hakerek. UNPFA iha hanoin atu ita selebra loron ne’e hodi fo hanoin ba governu no parseiru sira hotu hodi investe iha area Juventude nian”Informa nia
Alende ne’e mos Sekretariu Executivu CNJTL Mateus Lemos Soares, afirma katak hanesan mahon ba organizasaun juventude sira hotu ne’ebe mak simu konfiasa husi governu liu husi Ministériu Juventude Desportu Arte no Kultura hamutuk ho parseiru ne’ebe estabelese komisaun organizadora hodi organiza aktividade hotu iha munisipiu Dili.
“Ami sente onra tebes ba hola parte hanesan organizasaun juventude atu enkoraja foinsa sira hodi hola parte iha loron ne’e”. Nia subliña
Marsa ne’e hahú husi Palasiu Presidensial Aitarak-laran to’o Kampu Futsal Largo Lesidere hodi halo jogu amizade, informa mos katak konsertu musika sei hahu iha orsida kalan tuku 7:00 to’o remata iha Resintu Ministériu Juventude Desportu Arte no Kultura
Jornalista : Marcela Mery da Costa