Hametin Nasionalismu & Unidade ! OJETIL Reajusta Estrutura Iha Cotamuto
SAPNewsTL, Lautém: Organizasaun Juventude Estudante Timor-Leste (OJETIL) reajusta estrutura iha Postu Administtativu Luro, Suku Cotamuto. Objetivu husi reajustamentu ne’e hodi hametin liu tan ispiritu patriotismu no nasionalismu kontribui no partisipa ativa iha dezenvolvimentu nasionál.
Iha Diskursu Responsavel OJETIL Suku Cotamuto, José da Dores kódigu Abu-abu Taka Matan haktuir sorumutu ohin ho hanoin ida reajusta estrutura iha baze no reforsa ispíritu patriotismu no nasionalismu, Unidade no Estabilidade, nune’e bele kontribui dezenvolvimentu nasionál.
“Ohin ami hasoru malu iha ne’e, ho objetivu hodi reajusta estrutura OJETIL iha Cotamutu, nune’e bele hametin ispíritu patriotismu, nasionalismu, unidade no estabilidade hodi kontribui ba dezenvolvimentu nasionál”. Tenik José da Dores liu husi nia diskursu iha Suku Cotamuto, Postu Luro, 29/01/2024
Responsavel OJETIL Suku Cotamutu ne’e informa, nia parte fo ona sasin ba membru OJETIL Suku Cotamutu hamutuk sanulu resin haat (14) iha verifikasaun dadus 2009 iha tinanhirak liu ba, enkuantu sira ne’ebe seidauk hetan atensaun hamutuk limanulu resin-neen (56).
“Permite ha’u atu fo sai katak membru 14 mak hetan ona verifikasaun, na’in 17 mak mate, entre sira na’in hitu mak hetan ona dignifikasaun, maibe membru na’in 56 inklui ha’u mak seidauk hetan digifikasaun iha Suku Cotamuto kompostu husi aldeia Etanice, Buanomar no Ouroma”. Nia informa
José da Dores, mos husu ba nai ulun sira hodi fo mos atensaun ba sira ne’ebe to’o agora seidauk hetan dignifikasaun no rekunhesimentu husi estadu Timor Leste.
Iha oportunidade ne’e, Prezidente Assosiasaun Veteranus Postu Luro, Leopoldo da Conseição luta ba ukun an ne’e barak ka uituan ema hotu halo maka Timor bele hetan livre no soberanu, tan ne’e husu ba foinsa’e sira hotu hodi buka hatene istória ne’e ho klean no didiak.
“Ukun an ne’e barak ka uituan ema hotu halo, tan ne’e husu ba foinsa’e sira tenki buka hatene istóriu Timor nian ne’ebe inan aman avó sira halo, hamrik hamutuk hodi kontribui ba dezenvolvimentu nasaun nian”. Teni Lepoldo da Conçeição
Partisipa iha Serimonia ne’e maka Sekretariu Zona Ponta Leste, Presidente OJETIL Munisipiu Lautém, Xefe Suku Kotamutu, Xefe Aldeia Buanomar, Etanice no Ouroma, Administrador Postu Luro, membru OJETIL no foinsa’e sira.
Jornalista : Etelvina dos Santos