Hatutan Eransa Dom Boaventura, Kaza Militár PR Rekruta Forsa Tradisionál 35

SAPNewsTL, Dili : Kaza Militár Prezidénsia Repúblika rekruta ona moradór foun hamutuk na’in 35, husi suku Bairro Pité, Kampu Alor, Vila Verde, Motael no Fatuhada, hodi haforsa moradór 35 ne’ebé rekruta iha tinan 2007 liu ba, Rekturadu hirak ne’e  ho idade entre 18 to’o 25 ho prosesu rekrutamentu ne’ebé rigor husi Kaza Militár Prezidénsia Repúblika.

“Sira 35 ne’ebé antes ne’e rekruta, sira uluk la tuir treinamentu fíziku, selesaun no sira bolu de’it atu hamoris forsa tradisionál no agora sira treinu hamutuk fila fali. Durante ne’e, ami halo teste fíziku, atestadu médiku ba sira para bele hare ida ne’ebé mak saudável no fíziku di’ak mak bele halo servisu” informa Xefe Kaza Militár Interinu, Major Francisco da Silva, hafoin inspesiona ensaiu husi Moradór sira, Iha Palásiu Prezidensiál Nicolau Lobato, Dili, 17 Dezembru 2022

Tuir Kaza Militár, servisu moradór ba tinan oin, sei aumenta liu tan, liu-liu atu simu bainaka husi rai rai laran no rai liur.

“Xefe Estadu sira mai husi rai liur, ita-nia Xefe Governu mak mai vizita, sira sei forma iha portaun entrada, sira sei hu’u korneta, baku tambor no halo grupu poder, hanesan iha foho, lia na’in halo. Sira fó bem-vindo ba bainaka sira atu mai vizita sua Exelénsia Prezidente Repúblika no mós vizita ba ministériu sira seluk” haktuir Maijor Francisco.

 

Inisiativa husi Moradór lansa iha tinan 2007, durante mandatu dahuluk Prezidente Repúblika José Ramos-Horta ho intensaun atu fó oporunidade ba moradór sira hodi fó seguransa tradisionál ba uma-lulik Timor nian ka Palásiu Prezidénsial.

Moradór ka forsa tradisionál eziste dezde kolónia Portugueza no Liu-Rai Dom Boaventura uza hodi halo revolta hasoru kolonia no mos uza ba atividade kulturál, relijioza no atividade formal seluk.

Tuir planu, lansamentu ba Moradór sei akontese iha loron 9 fulan Janeiru tinan 2023 no kada segunda no sexta-feira tuku lima loro-kraik, sei iha atrasaun moradór sira, hodi públiku bele assiste no inisiativa ne’e integra ho programa Palásiu Nakloke.

Enkuantu, Inisiativa rekruta forsa tradisional atu promove imajen Timor-Leste, liuhosi atividade kulturál, hodi bele sai alvu ba atrasaun turístika.

Jornalista : Vensencio Saldanha