Husu Demisaun Ba VMI No VMJ, C12N : Kondekora Gastão Piedade

(SAPNews TL) DILI : Komite 12 Novembru “Mate Restu” husu Primeiru Ministru Taur Matan Ruak atu demite Vise Ministru Interior no Vise Ministru Justisa, tanba  la’os Gastão Piedade ne’ebe defende estadu liu husi Servisu Nasional Investigasaun (SNI), maibe halo fali intervensaun ba kazu lori osan rihun 130 USD sai husi Timor-Leste

“Ami husu Primeiru Ministru Taur Matan Ruak hodi fo parabéns, eleva pozisaun no kondekorasaun ba Gastão Piedade hodi demite Vise Ministru Interior ho Vise Ministru Justisa laos Diretor Sentru Nasional  Investigasaun (SNI) Gastão Piedade ne’e tanba Aksaun ne’ebe Gastão Piedade halo ne’e hasoru risku ne’ebe hasoru mos nia dirijente  maka Primeiru Ministru rasik”. Tenik Prezidente Komité 12 Novembru “Mate Restu” Gregório Saldanha ba jornalista sira iha edifisiu Komite 12 Novembru Balide, Dili, Sabadu (16/10).

Prezidente Komité ne’e akresenta, sira prontu defende nafatin estadu ida ne’e hodi kontra aktu sira ne’ebe kontra lei, nune’e sidadaun ida labele halo tuir nia hakarak tanba aktu ne’ebe membru Partidu Khunto lori osan rihun 130 USD sai husi Timor-Leste ne’ebe kontra lei

Gregório afirma, Tuir lolos Vise Ministru Interior no Justisa ne’e defende prioridade estadu laos interese partidu, komité mos husu povu Timor-Leste halo asaun protesta ba kazu ne’e

“Partidu Khunto tuir lolos kaer ukun ne’e defende prioridade estadu laos defende interese partidu nian, ami husu atu povu Timor-Leste hamriik protesta hahalok sira ne’e, ohin komite halo aksaun protesta ho dalan “mimbar bebas”, para ema hotu bele mai hato’o protestu ba aktu sira ne’ebe sai ona konsumu públiku, karik Primeiru Ministru demite Gastão Piedade ami la simu, ami sei halo protesta hodi hasoru aktu sira ne’ebe kontra lei”. Tenik Gregório

Reportajen : Augusto dos Santos

Editor          : Ekipa Editorial