Inkapasidade Jestaun ! Juventude FRETILIN Konsidera Guvernu Sei Oho Povu
SAPNewsTL, Dili : Relasiona ho informasaun aimoruk ne’ebe menuz iha ospitál, iha ne’ebe Ministra Saude fo kulpa ba Ministra Anterior, Juventude FRETILIN (JF) konsidera Ministra Saude Elia Amaral no IX governu ne’ebe lideradu husi Primeiru Ministru Kayrala Xanana Gusmão inkapasidade iha jestaun.
Tuir portavoz Komisariu Politika Nasional Juventude FRETILIN Juvelini A. A. Fernandes haktuir iha Konstituisan Republika Demokratika Timor-Leste iha artigu 57 (saude) alinea A katak “Estadu hatene katak ema hotu iha direitu ba saude,asistensia medika sanitaria, no mos dever atu defende no promove direitu ne’e
“Agora dadaun iha Hospital Nasional Guido Valadares aimoruk kuaze 120(atus ida ruanulu)items resin mak laiha ou 20% husi 454 items medikamentu laiha stock out no komsumiveis atu apoiu tratamentu, no reajente hodi detekta moras balun laiha no tenke haruka fali ba iha klinika privadu ne’ebe selu ho montante bo’ot tebes,hanesan mos sentru saude sira seluk ne’ebe iha teritoriu Timor laran tomak”. Dehan portavoz Komisariu Politika Nasional Juventude FRETILIN Juvelini A. A. Fernandes iha sede FRETILIN, 17/01/2023
Portavoz ne’e hatutan “Tuir informasaun ne’ebe hetan husi INFPM(Institutu Nasional Farmasia no Produtu Mediku),dadus husi 4 de Janeiru 2024 hatudu ba nesesidade ba ai moruk iha rai laran hamutuk 1.482(Rihun ida atus haat ualu nulu resin rua) no items ne’ebe agora dadaun iha hela ita nia liman hamutuk 982(Atus sia ualu nulu resin rua),sei falta tan items 500 (Atus lima) mak presiza koresponde 34% stock out”. Tenik Portavoz
Juventude FRETILIN ne’e konsidera guvernu dasia la iha kapasidade hodi halo jestaun.
“Ministra Saude responde ba falta ai moruk sira ne’e nia inkapasidade tomak hodi duun fali kulpa ba VIII Governu ho nune’e Juventude FRETILIN konsidera katak Ministra Saude no IX governu ne’ebe lideradu husi Primeiru Ministru Xanana Gusmão inkapasidade iha jestaun”. Nia hatete
Juventude FRETILIN ne’e husu ba guvernu atu imediatamente halo rekrutamentu ba pessoal saude sira ne’ebe kualifikadu.
“Husu ba guvernu atu foti medida imediatu hodi lalais rekruta fali pesoal saude hirak ne’ebe kualifikadu hodi prienxe fatin sira ne’ebe sei mamuk tanba diskontinuasaun kontratu ba profisionais saude sira, nune’e bele normaliza hikas servisu atendementu publiku ba sidadaun sira, tenke inklui destituisaun ka subtituisaun ba ofisial ne’ebe okupa kargu sefia kada diresaun no instituisaun autonoma sira ne’ebe foin mak nomeia, maibe laiha kualifikasaun naton atu ezerse nia servisu”. Juventude FRETILIN informa
Juvelini mos hameno atu guvernu urjentemente foti medida ruma hodi halo akizisaun ba aimoruk no halo revizaun ba tarefas servisu.
“Foti medidas urjente hosi akizisaun aimoruk no bens konsumaveis sira ne’ebe dadauk nee ‘Out of Stock’, halo revizaun ba tarefas servisu entre chefia Ministeriu Saude nian,no atribui kompetensia lolos ba vice ministru ne’ebe responsabliza ba servisu operasional hospitais sira”. Nia hameno
Portavoz Juvelini mos hato’o atu guvernu dasia liliu Ministra Saude labele halimar povu nia destinu.
“Ami husi Juventude FRETILIN, husu ba Primeiru Ministru no membrus governu hot-hotu liliu Ministra Saude atu labele halimar ho povo nia destinu, ema hotu sei mate maibe labele mate tamba laiha aimoruk, ami konsidera Ministra Saude laiha kapasidade jestaun no ikus mai hamosu krize de Saude ba povu tomak no oho neneik povo tamba laiha aimoruk tan deit inkapasidade jestaun husi Ministra saude rasik”. Nia tatoli
Entretantu, Hatan ba kestaun hirak ne’e Ministra Saude konsidera informasaun ne’e espalla katak ema mate barak tan laiha aimoruk no pessoal saude ne’e bosok, Ministra mos informa katak aimoruk naton hela hela responde ba nesesidade pasiente nian inklui aimoruk balun sei to’o iha fulan fevereiru no marsu nia laran.
Jornalista : Isabel de Deus