KRAM & PNTL Fiskaliza Sentru OAM 1.042 ! GAM Ne’ebe La Prense Kritériu Kontinua Suspende
SAPNewsTL, Dili: Komisaun Regulador Arte Marsial (KRAM) hamutuk Polisia Nasional Timor-Leste (PNTL) sei finaliza Re-Fiskalizaaaun ba sentru ka fatin treinamentu Organizasaun Arte Marsial (OAM) PSHT, KORK no IKS-PTL iha territoriu Timor-Leste hamutuk 1042 iha munisipiu Dili no Região Administrativa Espesial Oe-Cusse-Ambeno RAEOA.
“Husi 1042 fatin treinamentu (ranting) organizasaun arte marsial PSHT, KORK, IKS-PTL iha Timor-Leste, fatin treinamentu 993 mak ita kobre hotu ona husi munisipiu 11 iha semana kotuk, hela Dili ho RAEOA mak ita seidauk kobre, organizasaun tolu ne’e iha Dili ho RAEOA hamutuk atus ida resin ,” dehan Prezidente KRAM Octávio da Conceição ba jornalista sira liu husi konferensia imprensa iha salaun KRAM Lecidere, Dili sesta (19/01/2024).
Prezidente hatutan, Bazeia ba dadus husi munisipiu Dili KRAM rejista, total klube sira eziste iha kapital Dili rasik, PSHT iha 96, IKS-PTL iha 70 resin no KORK iha 28. Nune’e, KRAM ho PNTL sei halo atividade re-fiskalizasaun durante semana ida nia laran, tuir orariu iha loron sabadu, 20 janeiru 2024 KRAM ho PNTL Munisipiu Dili husi Postu Administrativu Metinaro no Cristo Rei sei kontinua hala’o atividade re-fiskalizasaun ba fatin treinamentu husi oragzanisaun tolu nian iha kapital Dili
Iha RAEOA mos KRAM iha RAEOA hamutuk PNTL iha RAEOA halo re- fisklizasaun ba organizasaun arte marsial tolu ne’e.
Octavio informa tan, iha atividade re-fiskalizasaun ne’e bazeia ba rezolusaun governu numeru 45/2023, 10 novembru kona-ba suspensaun bá Atividade Prátika Arte Marsial iha Timor-Leste, durante loron 90, KRAM ho PNTL haree liu ba pontu importante sira mak hanesan, identifika se mak responsavel ba klube ka fatin treinamentu ne’e, identifika se maka treinado.
Sé maka hala’o treinamentu ne’e, atleta feto mane hira, fatin treinamentu ne’e asesu ba estrada ka la’e? no mos nakloke ba ema hotu atu bele haree ka lae? ka subar deit, fatin treinamentu ne’e iha autorizasaun husi autoridade lokal, hanesan xefe aldeia, xefe suku too OPS suku ka lae?
Nia salienta tan, depois rezolusaun ne’e publika iha jornal republika, KRAM ho komandu PNTL halo kedan atividade re-fiskalizasaun bá munisipiu 11 finaliza ona iha semana kotuk, rezolusaun governu númeru 45/2203, 10 novembru, ida ne’e fo mos orden servisu ba KRAM no komandu jeral PNTL atu halo re-fiskalizasaun ba fatin treinamentu ka klube sira prátika atividade artes marsial iha territóriu timor laran tomak.
Iha 2022, KRAM hasai diretiva daruak publika ona iha jornal republika hatuur pontu 18 sai nu’udar kritériu baziku ba re-estabelesimentu fatin treinamentu ka klube sira prátika artes marsial iha TL, ida ne’e sai sasukat bá atividade re-fiskalizasaun sira hala’o tiha ona.
Prezidente KRAM afrima tan, atividade re-fiskalizasaun ne’e involve husi ekipa KRAM nasionál no sub-KRAM iha munisipiu sira, hamutuk ho komandante Komandu PNTL Munisipiu, Eskuadra no Ofisial Polisia Suku (OPS) no apoiu husi Komandu FALINTIL Forsa Defeza Timor-Leste (F-FDTL) ninia destakamentu sira iha munisipiu.
Autoridade seguransa sira seluk, hotu-hotu ninia apoiu maka re-fiskalizasaun iha munisipiu 11 remata iha semana kotuk hela Dili ho RAEOA mak seidauk, bainhira sira konklui atividade re-fiskalizasaun iha territóriu nasional, sira sei aprezenta relatoriu final ba governu liu husi Ministru juventude, desportu arte kultura Nélio Isaac Sarmento, ministru interior Francisco da Costa Guterres, hafoin ida-ne’e, sei aprezenta fali ba sorumutu konsellu ministru nian, maibe organizasaun arte marsial mak la priense kriteria mak tau ona iha diretiva KRAM, sei kontinua hetan suspensaun.
Sira priense kriteria KRAM sei rekomenda ba Governu liu-liu ba ministru juventude desportu arte Kultura, no ministru interior, hodi aprezenta ba konsellu ministru, hodi hetan apresiasaun, no mos iha desizaun ikus, rezultadu ba desizaun fo sai iha fulan-marsu tinan ne’e.
Reportajen: Augusto dos Santos